النهارده عدي سنة ويوم من غير اكتئاب
بغض النظر عن انـتـكـاسـتـيـن بس، يعني
لكن الحمد لله.

الموضوع بدأ معايا بخوف، وعياط، ورعشة كل يوم
وكنت فاكرة بسبب الامتحانات
خلصت امتحانات، وجالي أرق
كنت بقعد باليومين وبالتلاتة عيني ما شافـتـش النوم
شوية وجالي فقدان شهية
أسابيع ما بـحـطِّـش في بقي غير ماية
ويوم ما كنت أحس إني هـ قع، كان ممكن آكل بطاطساية بالعدد.

أنا ما كـنـتـش أعرف إن ده اكتئاب، ولا حد كان يعرف
شهر والتاني، وانا كل الـلـي كنت عايزاه أبـطَّـل عياط
طب أفهم إيه الـلـي بـ يحصل؟

عدى 6 شهور، وبـقـيـت كل الـلـي عايزاه إن الدنيا تخلص
قررت أنتحر مرة واتنين
وكل مرة كنت بـفشل، أو بـ مسك نفسي في آخر لحظة.

مع بداية الاكتئاب، قررت أصلِّي لأني ما كـنـتـش بـ صلِّي
افتكرت إن ده الحل، وما بـقـيـتـش بـ فوِّت فرض
شوية وبقيت أقرا قرآن كل يوم
الموضوع ما بـ يـتـحـسـنـش
يمكن كان بـ يـسـاعدني في لحظات قرار الانتحار
إنه لأ، ربنا قادر يـغـيَّـر
لكن غير كده لأ.

أنا كنت عايزة كل حاجة تخلص
دكتور القلب قال لي مالـكـيـش علاج
كنت حاسة إن الدنيا دي ما لهاش لازمة، وكفاية كده.
الموضوع كان بسبب ناس خرجت من حياتي فجأة
حب، وصحاب، وأحلام.

أنا خفِّيت، بس الاكتئاب خد مني عمر
وحاجات عمرها ما هـ ترجع تاني
الدعم هو الحل الوحيد في الفترة دي
وإيمان الـلـي بـ يدعم إنك تقدر.

الـلـي عنده اكتئاب مش هـ يصدَّق أبدًا إن بكرة أحلى
ولا إنه يقدر يستنى لبكرة أصلًا.