مش فاكرة كان عندى كام سنة بالظبط، لكن كنت كبيرة كفاية إنى أفهم وأرد ... بس خفت أرد
كنت فى التاكسى لحوالى نص ساعة ما حصلش فيهم حاجة
لما قربنا على الشارع اللى كنت هـ نزل فيه السواق قالى "عايزاه من قدام ولا من ورا؟"
وبصلى فى المراية بصة ما فهـمتـهـاش غير بعد سنين بعد ما حصلى تحرش أكتر من مرة
عرفت إنها نظرة استباحة
استباحة أجساد وآذان، وعيون الستات والبنات.
استباحة مرتبطة باعتبار الشارع فى مصر فضاء ذكورى تُعاقَب فيه البنت لمجرد المرور فيه
استباحة ما شفتهاش لما سافرت فى أى مكان برا مصر
استباحة هى واحدة من أكبر الأسباب اللى بـ تخوفنى كل مرة بـ رجع فيها مصر
بلدى وبيتى اللى مش عارفة أمشى فيه.
استباحة
2017