آخر صورة اتصورتها مع بابا كنت في KG 2
دي كانت الفترة الوحيدة الـلـي كنا قريبين فيها من بعض.

بعدها، شغله زاد، ومستوانا المادي ابتدا يتحسن
بقى بـ يعاملنا وحش أنا وأخواتي
على طول ضرب، زعيق، وإهانة
بـ يديني فلوس، لكن بنفس وحشة.

كان شديد جدًا
لدرجة إني كنت طفل انطوائي جدًا في المدرسة
دايمًا بـ قعد في الديسك الأخير لوحدي
ما عنديش صحاب
والعيال بـ تضربني، وتاخد مني ساندوتشاتي.

كنت على طول أنا الـلـي غلطان
وحتى ماما كانت بـ تاخد صفه
مفيش حاجة اسمها عيد ميلاد
على طول: "ذاكر، ذاكر"
ممنوع أخرج، ممنوع أتفرج على التليفزيون
وممنوع أكلم حد، ممنوع ألعب كورة
كل حاجة ممنوعة
الأكل بمواعيد، والشرب بمواعيد
حتى لو قعدت برا بعد الدرس 5 دقايق، بـ روح آخد علقة.

في تانية ثانوي، ما كنتش قادر
وجيبت 45 ٪ لأن بابا صمم يدخلني علمي، وانا كنت عايز أدخل أدبي.
لكن في 3 ثانوي، حولت أدبي
وقررت أذاكر عشان أدخل الكلية الـلـي أنا عايزها.
ذاكرت، وجيبت 95٪
لكن بابا قال لي: "هـ تدخل حاسب آلي".

فـ روحت من وراه، وقدمت في شرطة وحربية
وحولوني جوية، وكنت فرحان.
بس بابا عرف، وكان عايزني ما ابعدش عنه،
وافضل بـ شتغل معاه في جنوب سيناء
فـ بَعَت واسطة عشان ما اتقبلش
في الآخر دخلت تجارة تعليم مفتوح في بورسعيد بالعند فيه.

بدأت أشترك في أنشطة مختلفة،
واتعلمت حاجات مختلفة، وعملت أصحاب
كنت من وانا صغير بـ شتغل مع بابا
بس قررت من فترة أعتمد على نفسي
فـ استلفت شوية فلوس، على فلوس كنت محوشها،
وفتحت كافيه صغير في بور فؤاد
وبقيت مش محتاج فلوس من حد
وبطلت آخد مصروف.

وبعدها بفترة، بابا قال لي:
"هـ تسيب الـلـي أنت بـ تعمله ده وترجع تشتغل معايا امتى؟"
قولت له إني حابب الـلـي بـ عمله،
وعايز أفضل هنا، واكبره، وافتح فروع تانية
عايز يبقى لي شغلي لوحدي،
وعايز ابني حياتي هنا في بورسعيد.
فـقال لي: "لأ، أنت آخرك تدرس في بورسعيد بس
وبعدها ترجع تشتغل معايا، وتمسك المحلات بتاعتي،
تقفل الكافيه ده"
وفعلًا اتدخل، وقفل لي الكافيه.

قعدت 5 أيام في السرير بعدها مش قادر أتحرك
ما واجهتوش بكل الـلـي شايله منه، وطريقته معايا
غير مرة واحدة بس بعد مشكلة حصلت بيننا
قعد يعيط بعدها
فـ افتكرت إنه أخيرًا حس بيا، لكن لاقيته بـ يقول لي:
"لأ، أنا عيطت عشان ما عرفتش أربيك
أنت مش محترم
يا ريتني ما دخلتك كلية،
كان مفروض أخليك قاعد هنا جنبي من غير صحاب ولا نيلة".

أنا دلوقتي الـلـي بـ قول له
"إزيك؟"، و"واحشني"
و"كل سنة وأنت طيب" في عيد ميلاده
بـ حاول أتكلم معاه، ونفسي يحس بيا.