أنا ماما اتوفت وانا صغيرة قبل ما الدورة تيجي لي،
كانت تيتة وقتها عايشة معانا، وعمري ما سمعت عن الدورة.
كان عندي 10 سنين، وبـ متحن،
فجأة دخلت الحمام، لاقيت في دم في الأندروير.
اترعبت، بس بكل هدوء غيرت ولا كأن حصل حاجة.
عملت نفس الحركة 3 مرات، لحد ما تيتة أخدت بالها إن فيه حاجة،
وسألتني، انهرت من العياط، وقعدت اتأسف، واحلف إني مش بـ عمل بيبي وفي دم.
تيتة سكتت، وسابتني، وراحت كلمت عمتو في التليفون.
شوية وعمتو كانت عندنا في البيت، وقعدت معايا.
برضه قعدت اتأسف، وفجأة قالت لي، وسكتتني، وشرحت لي إن دي البيريود،
وقالت لي: "أنتِ كده كبرتي، وخلاص مفيش لعب، وتبطلي تكلمي صحابك الولاد"
كرهت البيريود، وكرهت نفسي، وكرهت عمتو.
كنت بـ لف صدري برباط ضاغط عشان مش عايزة أكبر.
عدت المراهقة عليا وانا كئيبة و حزينة،
بس الدرس الـلـي طلعت بيه إني فهِّمت أخواتي يعني إيه دورة قبل ما تيجي لهم.
طلعت من الدايرة دي وانا عندي 17 سنة،
اكتشفت إن عندي ورم حميد في المبيض، واضطريت أشيله،
ساعتها بس فهمت يعني إيه أنا بنت.
حبيت نفسي، وجسمي، وحتى البيريود حسيت قد إيه هي مهمة.