الموضوع بدأ من ست سنين، ست سنين بحالهم
كنت بحس إني تعبانة جدًا وماعنديش أي طاقة
وبعدين بدأت في 2012 أحس بوجع في ضهري ورجلي، وبدأت جلسات علاج طبيعي
في الجلسات دي، اكتشفت مع الدكتورة بتاعتي إن في مناطق كتير تانية في جسمي مشدودة جدًا ومتوترة
عملت شوية فحوصات وأشعة، واللي فاجئني إن تقنيًا يعني، ماكانش فيا أي حاجة

في 2015 عملت عملية إجهاض وبدأت كل حاجة حواليا تنهار
كنت لسه واخدة بالصدفة معاد مع دكتورة العلاج الطبيعي بتاعتي قبل ما أعرف إني حامل
الرحلة بدأت بمضادات اكتئاب خلتني أحيانًا أحس إني أحسن، بس في أوقات تانية ما كانتش بتساعد في أي حاجة
وجع جسمي ماراحش، وساعتها اتشخصت بالفيبروميالجيا

عارف يعني إيه يكون عندك فيبروميالجيا؟

يعني تحس إن مخك واقف
وإن أطرافك تقيلة وأي حركة صغيرة محتاجة طاقة ومجهود كبار جدًا
عضلاتك طول الوقت مرهقة وبـ تتهز بسهولة
وضعيفة جدًا
لما بـ تحاول تمشي بـ تحس كأن حد رابط أكوام طوب في رجليك ودراعاتك
كأن عندك برد طول الوقت، ده غير إنك دايمًا حاسس كأن حد مسك مضرب بيس بول وفقعك علقة،
بس رغم ده المفروض إنك تتحرك وتتعامل عادي
كأن جسمك كله مليان كدمات، بس الكدمات دي مش باينة ولا متشافة
وأحيانًا بتتمنى لو كان غيرك قادر يشوفها، يمكن ساعتها حد ياخدك بجدية
كأن هيكلك العظمي كبير على جسمك، وكل عضمة فيه ملوية في مكانها
جسمك بـ يكون يا ساقع جدًا يا سخن جدًا، عمر ما بيكون درجة حرارته طبيعية،
وكل ده جنب إنك حاسس بحرقان طول الوقت، كأن جسمك كله مغروز فيه سكاكين، وبتتعرض لصدمات كهربا مرة واحدة

كأنك راكب مرجيحة ما بـ توقفش
أصعب وأقوى وأكتر مرجيحة بـ تخوف في العالم، حتى لو عمرك ما ركبت واحدة قبل كده

الفيبروميالجيا عاملة زي ما تكون عصاية الجمباز اللي وقعت وانت بتتنطط فوقيها
أثرها ما بـ يروحش أبدًا
الألم اللي بـ حس فيه كبير لدرجة إني ما عدتش قادرة أبص للدنيا بأي نظرة إيجابية
تعبت من كتر ما بحس إني تعبانة
مابعرفش أهرب غير بالنوم، بس حتى بعد ما بصحى بفضل حاسة إني تعبانة

بـ ينصحوني أعمل تمارين
محدش مدرك ده صعب قد ايه، خصوصًا لما تكون حاسس إن أي حركة بتخليك عايز تضرب نفسك بالجزمة من كتر الوجع اللي إنت حاسس بيه
لما تمشي حتى ولو مسافة قصيرة جدًا، بـ تحس إن عمودك الفقري هـ يتكرمش ويقفل على بعضه

بـ ينصحوني أخس
بـ حاول، والله بحاول
المشكلة إني عشان بطلت أتحرك زي زمان الموضوع بقى صعب جدًا
أنا عارفة إن الوزن اللي زدته بعد ما تعبت بـ يخلي الموضوع أسوأ
وبـ يقلل ثقتي في نفسي كمان، وده بـ يخلي كل حاجة أوحش
بكره الدوا، لكنه للأسف الحاجة الوحيدة اللي قادرة تساعدني حاليًا
عندي اكتئاب؟
أكيد بيجيلي نوبات اكتئاب، زي اللي بمر بيها دلوقتي
لما تحس إن كل حتة من جسمك بـ توجعك، سهل إن يجيلك اكتئاب

كل عرض من الأعراض اللي بمر بيها بيخلي التاني أسوأ
بحاول أكون إيجابية
في أوقات بيكون عندي طاقة أعمل حاجات أكتر واستمتع بحاجات أكتر،
بس أعمل إيه في الأوقات التانية طيب؟

بدأت أفقد الأمل
ما ينفعش أسيب نفسي كده
لازم أفضل مصدقة إن في أمل،
بس لحد ما ده يحصل، فالفترة دي من حياتي صعبة، صعبة أوي والله

لازم أفضل متمسكة بفكرة إن كل ده هـ يعدي
يا رب بس يعدي بسرعة