قبل ما يتوفى جوزي كانت القضية لسه شغالة
الله يرحمه كان يقول لي: "لو اتحكم عليكى لو ترسى على العمر هـ بيعه"
المهم بعد أما اتحكم عليا واتوفي
الراجل اللي لبسني قضية راح سعى لتنفيذ الحكم
قعدت هربانة خمس سنين بقيت مش قاعدة في البيت خالص
ولو قعدت فى قلب البيت تلاقيني بقى ولا أعرف أنشر ولا أعرف أعمل حاجة
كنت أخرج سرقة وأطلع سرقة
المهم كنت في مكان وفوجئت إن أنا متراقبة واتمسكت ودخلت المكان ده
لما دخلت الموضوع كان صعب جامد
صعب لدرجة إنى أما كنت قاعدة فى المكان ما كنتش مختلطة بحد خالص
ما كانش فيه غير دمعتي
كنت أخاف
كنت أبص للناس كده وما أتكلمش مع أي حد
لحد ربنا ما جاب الفرج
رفعوا ولادي قضية استئناف والحمد لله طلعت
لما طلعت طبعا كنت في حالة غير الحالة خالص
أنا فعلا قعدت مدة صغيرة
بس قعدت تلات سنين أتعالج من جسمي
وده كان آلمني جامد جامد كأنهم ستين سنة
فما كـنـتـش طايقة أتكلم مع حد وكنت محرجة
رغم إن عندى العمارة والشارع والدنيا كلها عارفة إنى مظلومة
وبعد ما طلعت ربنا خد حقى
لاقيت واحد اتصل بيا وقالي: "يا أم منير ربنا جاب حقك"
"ربنا جاب حقي إزاي؟"
"فلان الفلاني اتحبس"
"إيش عرفك"
"الجرايد"
مش شمتانة بس الله مش بـ يسيب حق حد
كنت في حالة غير الحالة خالص ..
بس مش بـ شمت لأ
الحمدلله إني دخلت بيتي
أول ما دخلت حسيت إنى مش عايزة أشوف حد، مش عايزة أبص لحد
فـلقيت ولادي وأحفادي يقولوا لي: "يا تيتة كلنا عارفين إنك مظلومة، ارفعي رأسك كده"
كانوا بـ يضحكوني على سبيل إني أنسي الموضوع
"طب احكي لنا، جوا فيه إيه؟"
أقول لهم: "لأ بـ حاول أنسى مش عايزة أفتكر"