طول عمري كان وزني زايد عن الـلـي حواليا، أتخن من أخواتي ومن صحابي.
كنت وانا صغيرة كله في أهلى بـ يتريق على شكلي،
وكان لازم أضحك، وآخد الموضوع عادي، يا إما هـ يتقال عليا بأفور.
كان أخواتي بـ يقعدوا يغنوا لي أغاني تريقة على جسمي،
ومش بـ يقولوا لي غير "يا تخينة"، و"يا فشلة".
الموضوع بقي معقدني، لحد ما اتصدمت في حد كنت معجبة بيه،
وكنت بـ حاول أقرب له، كنت فاكرة إني من حقي زي أي بنت أتحب عادي وأحب،
اكتشفت إنه بـ يقول عليا إنه بـ يصاحبني بس عشان بـ ياخد مني الكتب،
وحاجات في المذاكرة في الجامعة،
وبعرَّفه على ناس جديدة، لكن غير كده كان بـ يقول إنه بـ يكرهني، وبـ يكره شكلي،
وإنه عارف إني معجبة بيه، بس هو عمره ما هـ يرتبط بواحدة تخينة كده.
وبعدها ارتبط بأقرب صاحبة ليا،
ومن ساعتها وانا ما بحبش حتى أبص على نفسي في المراية،
وكرهت شكلي، وكرهتهم.