أنا لو بنت، هـ كمِّل تعليمي، يعني لحد ثانوي
يعني على حسب برضه هـ كون شاطر أو لأ
حتة الخروج برضك تكون بميعاد وبحساب
ما أخرجش متأخر، وما أخرجش لوحدى
اللبس هـ يبقى واسع، هـ كون محجبة وكده
مفيش لبس بناطيل والكلام ده
ما كـنـتـش هـ بقى مرتاح ساعتها.

-----
بنت خالتي خطوبتها النهارده
لو كنت بنت، كان حد من أهلي هـ يروح حاكمني
"ما تـقومـيـش تهزري مع ده"
"ما تـقـومـيـش تعملي"
"ما تـقـومـيـش تسوِّي، خليكي جنبي"
" ده بـ يـبص لك"، و"ده بـ يعمل لك"
و"ده بـ يسوي لك".

---
مش لازم شهادة عالية
لو معايا تمريض، دبلوم أي حاجة
كده كده هـ تتجوز وخلاص
وهـ يبقى موضوع السفر والشغل ده حاجة صعبة
وهـ تـلـتـزم شوية في اللبس وكده
اللبس هـ يبقى محترم شوية
المنطقة، والعزبة بقى، وكده
طبعًا مش هـ شتغل
ولو بنت، ممكن دلوقتي أبقى متجوزة
في البلد عندنا بـ يتجوزوا بدري بدري.
---
قعدت تخيلت كده شوية، لو أنا كنت بنت في ظروفي دي
الـلـي لمِّس معايا أوي هي حتة كلام الناس
كان موضوع الحجاب ده هـ يبقى أكيد
كنت هـ بقى محجبة، مش بشعري
وهـ لبس اللبس العادي.
نفس الشارع الـلـي أنا بـ مشى فيه كل يوم
لو أنا بنت أكيد كنت هـ سمع حاجات ما بـ سمعهاش
هـ سمع معاكسات، وكلام زبالة.

---
أنا لو بنت، كنت عادى هـ بقى بنت محترمة
كل يوم تصحى الصبح، مش عارف إيه وكده
كنت هـ بقى أقرأ كتاب
أقعد عند جارتنا مثلًا كده
كنت هـ شوف مثلًا عاوزين ياكلوا إيه في البيت
إيه الحاجات الـلـي بـ يحبوها، وأروح عاملها لهم
طبعًا مش هـ سيب حاجة في البيت متلخبطة
مثلًا واحد صحي، ما سواش سريره، هـ سويه
لو كنت بنت كنت هـ بقى منزعج جدًا الصراحة ...
---
ما ينفعش إن أنا أمشي في الشارع، وابص لواحد مثلًا عاجبني
هي نظرة واحدة وخلاص، أو أبص في الأرض
مفيش بقى إيه إن أنا أركز بقى معاه وكده.

كبنت كنت هـ حاول اتدارى عن الولاد
هـ حاول إن أنا أبعد عنهم كده
زى ما بـ يعملوا مثلًا في البلد
تيجى واحدة ماشية، تلاقى رجالة، تدارى نفسها
ما ينفعش إنها تورِّي وشها للناس
هو عندنا في البلد كده
وانا ماشي، على طول وشي في الأرض كده
لحد ما أوصل للمكان الـلـي أنا عاوزه
عشان محدش يقول إن أنا بت مش محترمة
والولاد هـ ينجذبوا ليا أكتر
هيقولوا: "آه البنت دي محترمة، ساكنة فين دي
عايزينها"، وبتاع.

------
أعتقد إن أنا لو عيشت يوم واحد بس من الـلـي البنت بـ تواجهه في الشارع ده
سواء سئالة ناس، معاكسات، كلام زبالة بـ يترمي
مش هـ ستحمل،
نفسيًا مش هـ ستحمل.

لو أنا بجد كنت بنت، ما كـنـتـش هـ بقى مرتاح
وكنت هـ بقى مقيد
وانا ما بحبش حد يقيدني أو يقفل عليا
بحب آخد راحتي
بحب آخذ حريتي كده يعني.

----
غير بقى إن أنا راجل، يعني أنا أقف على الناصية
أبحلق عادي، محدش هــ يعـيـبني.

----

لو كنت بنت؟
هو شيء غريب
انا أول مرة أقف في موقف زى كده
ما ينفعش
مش هقدر أحكي
اتكسف
ممكن أسمعها من حد تاني، واتقبلها
لكن اتقبلها من نفسي، صعب.

يعنى الراجل بـ يعتز بكونه راجل
والبنت بـ تعتز بكونها بنت
فـ اتخيل نفسي ليه مكانها؟
الفكر نفسه حاجه تشذ عن الطبع
أنا طبعي بـ تفادى أي حاجة لو بـ تقلل مني بنسبة قليلة.

الناس ممكن تقول
"إزاي يقول كده"
"إيه يا فوزية"
"أنت هـ تعمل فيها بت"
أنا عارف الـلـي بـ قول له ده مش هـ يحصل
بس أنا بـ بعد عن أي نقطة شك
أو أي حاجة فيها شبهات.