اتجوزت بعد قصة حب 6 سنين
كان بالنسبة لي كل حاجة في الدنيا
اصريت عليه، بالرغم من الفرق الاجتماعى الكبير
أهلي قالوا لي: "مرتبه مش هـ يعيشكوا
دول مش شبهنا".

بالرغم من كده، صممت اتجوزه
وأجبرت أهلي على التنازل عن حاجات كتير
منها الشقة الـلـي أهلي ساعدوه في تمنها
لحد الفرح، وفستان الفرح الـلـي دفعتهم من معايا أنا وأهلي.

كنت شايفة نفسي البنت الجدعة
الـلـي هـ تقف جنب جوزها عشان يكملوا حبهم
ويثبتوا لكل الناس إن هما الصح
وفعلًا اتجوزنا، وسافرنا أسبوع شهر العسل.

وفي آخر يوم في شهر العسل، يبدأ يبان الوجه الآخر
وبدأ يمد إيده عليا، ويرجعني لأهلي بشنطة هدومي
وبعدها بشهر، يمد إيده تاني
بس المرة دي قدام أهله.

ومن هنا بدأ انهيار الحب
وبدأت كل يوم المشاكل أكتر، وأكتر
وبدأت عيوب عمري ما شوفتها فيه تظهر
ما بـ يصرفش عليا، ينزل ويسيب البيت من غير جنيه
ما فكرش يوم يشتري لي حاجة، وشايف إيه يعني؟
أكيد أهلك هـ يجيبوها لك.

وبعد 6 شهور، كنت حامل، وكنت مبسوطة جدًا
بالرغم من علاقتنا السيئة، لحظة عشت أحلم بيها
وولدت، وما كانش بـ يصرف على ابني
وفي خناقة من الخناقات، قررت أروح لأهلي، وما ارجعش.

كرهت الشقة، و قررت اتطلق
سنة بـ اتحايل عليه يطلقني
كان بـ يـبـيـن لي إنه باقي عليا، وهـ يتغير
وسبحان الله، ربنا زرع كره ليه في قلبي عمري ما كنت اتخيله.

وفي يوم، روحت أجيب حاجة من شقتي
لاقيت بنات في بيتي، تقريبًا عايشين هناك
بـ يلبسوا من لبسي، وعايشين في شقتي الـلـي هي بفلوسي.

ورفعت خلع، وانتهى الموضوع بعد سنين
طلاق من غير ما آخد حقوقي
وخدت جزء من حقي في الشقة
حتى ابنه، مش بـ يفكر يسأل عنه
أقول إيه لابني لما يسأل عليه؟

أنا شوفت من أهله العجب
بدون الدخول في تفاصيل أكتر من كده

في عيوب عمرها ما بـ تظهر غير بالعشرة.