كنت ماشية أنا واتنين صحابي، بصيت ورايا لاقيت واحد بـ يعاكسنا من بعيد،
وأنا كنت واخدة بالي منه، لحد ما لاقيته جه جنبي،
وفضل يقول كلام قذر، و"تـتجوزوني أنتوا التلاتة؟" دي استفزتني،
وروحت زعقت فيه جامد، وهزقته، وخاف، وطلع يجري.
لاقيت صحابي سابوا إيدي، ورجعوا ورا،
كنا ماسكين إيد بعض إحنا وماشيين،
فـجم لما لاقوني بـ زعق فيه سابوني، ورجعوا ورا.
وواحدة فيهم كانت بـ تضحك، والتانية كانت خايفة،
وكان نفسها تعمل حاجة معايا بس خايفة.
قولت لهم: "إزاي تسيبوني وترجعوا؟ اقفوا جنبي".
واحدة منهم قالت لي: "افترضي كان معاه سلاح أو محشش،
وبعدين ممكن يتكلم علينا كلام مش كويس في نص الشارع".
والتانية زي ما قولت لكم هي ما كانتش جريئة،
وساعتها حسيت إني ماشية مع بنات مش جدعة،
وفي أي لحظة أكون في مشكلة أو خطر،
مش هـ يقفوا جنبي.
وحصل معايا الموقف ده كتير، إني أرد على المتحرش وصحابي يسيبوني ويمشوا،
وخايفة أظلمهم معايا، وأنا عارفة إن ده نتيجة التربية، والخوف من الأهل والمجتمع.