أنا خرجت من السجن 21 -7
كنت ضامنة صاحبتي
كانت جارتي وصاحبتي وحبيبتي
هي كانت سدت تمن شقتها وكل حاجة
بس كان عليها غرامات تأخير بدل ما تدفع يوم واحد، كانت بـ تدفع يوم عشرة
وانا ما أعرفش الحاجات دي كلها
لما اتحبست جت لي السجن وقالت لي: "أنا سديت وأخدت الورق وكل حاجة"
أما خرجت بقى رحت التخشبية في القسم
فـربنا كرمني بولد ظابط أنا كنت مربياه أصلا وربنا كرمه وبقى ظابط
والدته قالت له فـجه طبعا ضمني
جه يوم 22 ده الصبح والأمين راح قايل لي: "انت معانا سنة تاني"
"إيه؟"
"تبع قضية فلانة"
اللي هي صاحبتي اللي كنت ضامناها
"بس أنا ما أخدتش حاجة"
"مش انت كنت ضامنة صاحبتك؟ هي ما سـددتـش وانت هـ تـتـحـبسـي"
لاجل البخت أخويا كان مديني تليفونه رحت متصلة بيه
راح باعت لي حد ضمني
المأمور بتاع القسم قال: "تخرج وتروح تعمل إعادة إجراءات"
المهم خرجت جبت صاحبتي دي
أما عترت فيها قلت لها:"هو إيه اللى حصل؟"
"أنا سديت والله بس أنا ما أخدتش ورق المخالصة"
دفعت 4000 جنيه عشان أعمل مخالصة وهي ما ردت ليـش ولا جنيه
قالت لي: "سدي من اللي معاكي"
"هو أنا كنت خارجة من السجن معايا فلوس؟"
"سدي من اللى معاكي وأنا هــ ديـهـملك"
طبعا ولا أخدت منها جنيه
سديت عشان ما أرجعش تاني، ما صدقت خرجت
ورحت للمحامي وصرفت بتاع 3000 ولا 4000 جنيه
بعد كده رحت قعدت مع والدتي