أنا لما عيشت هناك اتبهدلت كتير
قعدت ست شهور أمي ما جـتـلـيـش وبعدها محدش غيرها جالي
أبويا ما جاليش غير مرتين في العشر سنين
كان تعبان نفسيا
وأمي قالت لي إن جاله جلطة بس خف
وبعدين عدى وقت واتفاجئت بأمي بـ تقول لي إنه مات

أيام الحوجة عدت عليا كتير
اللي معهوش ما يلزموش،
واللي ما يمسكش نفسه في المكان ده لامواخذة بـ يتركب
بـ يبقي تحت الرجلين، ولو يطولوا يدوسوا عليه يدوسوا

عملت كل حاجة
دخلت الورش
كنت بـ بـيـع لهم سجاير وكنت بـ ببدلهم بونات
وبلاعات وزبالة واكنس الحوش
لما كنت أجوع ويبقي مش معايا حاجة
كنت أقعد ورا الحيطة وأفضل أعيط
وساعات أروح أعيش مع واحدة أعمل لها حاجاتها

الأيام الحلوة كانت لما حد يبقى إفراج
كنا بـ نمسك الإيشاربات ونعمل منها بدلة رقص

أسوء حاجة كانت حرماننا من اللي برا
وأحسن حاجة خدناها من المكان ده هو الصبر
جوا مفيش أصحاب، فيه مصلحة
اللي بـ يصاحب حد بـ يبقي عشان فيه مصلحة.

أنا الورق بتاعي كان من المفقودين
لما قضيت تسع سنين وتلات شهور والناس اللي بعدي خرجوا
ست كبيرة قالت لي: "روحي اسألي علي ورقك انت مفروض تطلعي من بدري"
استأذنت من السجانات وطلعوني بالعافية
لما طلعت لـ أحمد بيه فضل يدور في الورق مش لاقي
وبعدين قال لي: "هـم راميين ورقك مع المفقودين ليه؟
اعملي جواب ميسرة"
المهم أمي عملت لي الجواب من برا

وفي يوم اتفاجئت إنهم على المغرب كده بـ يندهوا عليا إن الافراج طالع الصبح
كلمت أمي عشان حد ييجي يستلمني أمي ما حطتش منطق
الناس قالوا لي: "سورقت انت فين"
قلت لهم إني رايحة المديرية
لما رحت المديرية بيتوني يوم، وتاني يوم دخلوني عند ظابط المباحث
قالي: "هـ تتاجري تاني؟"
"أنا ما تاجرتش أولاني. أنا كان مكتوب كتابي وخدوني قبل تنجيدي بيوم، وحاجتي ضاعت"
"ضاعت في إيه؟"
"أمي باعتها عشان تجري ورانا في السجون أنا واخويا الكبير"
"يعني انت ما كـنـتـيـش بـ تبيعي مخدرات؟"
"لأ أياميها الظابط اتهجم عليا. بـ قوله انت واخدني ليه؟
ده أنا هـ نجد بكره وهـ دخل الخميس اللي جي. قال لي: أدخل عليكي أنا
روحت مـقـطـعـالـه الحاجات اللي حاططها هنا وعورته في وشه.
قال لي يا بت كذا والله ما هـ خليكي تشوفي الأسفلت، ولاقيته جايبني وعامل لي القضية
وأنا اتحكم عليا بالعشر سنين"
قال لي: "طب يالا امشي"

أنا جربت كل حاجة
اللي كانت معايا هي اللي خلتني أدمنه
وساعة ما المصلحة ما كانت تيجي أنا اللي كنت بـ خبي الحاجات بتاعتهم
تهريب من عنابر فوق لعنابر تحت من على المواسير