أنا بـ درِّس أولى ابتدائي
بـ نزلهم الحمام نظام مجموعات
في يوم جه ولد، وقال لي:
"يا ميس، فلان الفلاني وهو في التويلت
واحد من سنة سادسة أخدوا
وعمل فيه حاجات قليلة الأدب في الحمام" .
فأنا عارفة إن الكلمة دي ممكن يكون لها كذا معنى
ضربه بالقلم مثلًا؟
"يعني إيه قلة أدب يا حبيبى؟"
"قلعه البنطلون، وابتدا يعمله حاجات مش كويسة"
"أنت تعرف الولد الـلـي في سنة سادسة؟
طيب، أنا هـ آخدك معايا، ونـطلع سنة سادسة كأننا بـ نزورهم
وهـ تقول لي، من غير ما نـشاور عليه"
وحصل فعلًا، وروحت بعدها أخدت إجراء عند المدير.
وجبت الولد الـلـي تم التحرش بيه، وقولت له:
"إيه الـلـي حصل معاك في الحمام؟"
قال لي: "ما حصلش حاجة"
"حبيبي أنت مش فلان الفلاني أخدك الحمام؟"
قال لي:"آه"
"فتح السوستة بتاعة بنطلونك؟"
قال لي:"آه"
"نزل لك البنطلون؟"
قال لي:"آه"
"طب عملك حاجة؟"
قال لي: "لأ، ما عمليش كده عشان أنا قولت له عيب وحرام".
صدمني إن ولد في أولى ابتدائي
عارف إيه الـلـي بـ يحصل، وعارف عيب وحرام
بس هو غالبًا كان خايف إني أعمل له حاجة
وصدمني إن احنا وصلنا إن طفل في سنة سادسة ابتدائي
بـ يتحرش بطفل في أولى عشان مش هـ يقدر يتكلم.