لما دخلت السجن جم لي ناس قالوا إيه:
"هـ نسدد لك بس بشرط"
قلت لهم: "إيه الشرط؟"
"تطلعي مع طارق علام"
"بس طارق علام ده نسيبنا … من قرايبنا من البحيرة
أهله قرايبنا، قرايب ولادي واخواتي، يعتبر من العيلة …
يا جدعان ما لاقـتـوش غير طارق علام؟؟"

المهم طلعت مع طارق علام، اضطريت أطلع
كان اسمه إيه ده اللي كان رئيس السجن خدني وقال لي:
"الخمس ست آلاف دول انتي ممكن تقعدي العمر بحاله بيهم
ما فيهاش حاجة اطلعي في التلفزيون، اطلعي خدي حريتك بدل ما تقعدي عمرك كله تقضيه هنا"

"خلاص يا بيه اللى حضرتك شايفه"

وطلعت بقى …
صورني وأنا طالعة من باب السجن بالجلابية البيضا
بس لأ ما كنتش طلعت لسه ده هو صورني وأنا طالعة كده وكده، ودخلت تاني
يعني عديت باب السجن ورحت داخلة تاني،
أنا ومجموعة كده كنا طالعين ييجي خمس ست ستات كده
"طب يا أستاذ، طيب هو بجد ولا انتو صورتوني كده وخلاص؟"
قال لي: "والله مش هـ تقعدي غير أسبوع"
بعدها بيوم أدوني سرير وعرفت إني هـ خرج آخر الأسبوع
وأنا قاعدة يوم الجمعة الصبح لاقيتهم جايين بـ ينادوا إن أنا إفراج

طلعت من السجن على القسم
عشان الراجل كان رافع عليا تلت شيكات أمانة يعني تلات قواضي
قالوا لي: "لو كانت قضية واحدة كنتي طلعتي من السجن على البيت"
رحت القسم قعدت تلات أيام مش لاقية حد أبعت له من أهلي، محدش عايز ييجي
والقسم طبعا مستنين يكشفوا يعملوا وحاجات كده

المهم بعد أربع أيام جم بالليل راحوا مطلعيني
طبعا ماشية شايلة الهدوم والحاجة اللي كانت معايا جوا، وبـ خبط على الباب عند أهلي
(والله العظيم زي ما بـ أقول لك كده)
بـ خبط على الباب عايزة أخش الحمام، وعايزة أستحمى، أخواتي فتحوا لي الباب: "لأ مانـتـيـش هـ تخشي هنا تاني، مالكيش حاجة هنا"
وأنا كل اللي قعدتهم في السجن كانوا سبع أشهر، لا قعدت سنة ولا اتنين
طب أروح فين بقى؟ أقعد فين؟ ومحدش كان عارف من الجيران
ومحدش فيهم عايز يفتح لي الباب حتى أخش آخد هدوم نضيفة ...
الكلام ده كان خمستاشر شبعان

المهم إيه نزلت أخبط على واحدة من الجيران كان اسمها أم حسن
مش عايزة أقول لك كنت بـ عمل معاها إيه، بس أهو كله عند ربنا
واحدة تانية كانت تحت معهاش عيال كانت هي وجوزها، خبطت عليها
"بس أقعد طب للصبح بس"

المهم إيه خدت بعضي وطلعت وقفت في الشارع
ليا أخت واحدة فى البحيرة بس كانت مقاطعانى طبعا
لأن إيه أنا طلعت في التلفزيون
طب أعمل إيه؟ رحت لواحدة كنت أعرفها فى آخر الشارع عندنا
لاقيتها عزلت راحت الكفر،
طب أوصفوا لي هي ساكنة فين، قلت أبات عندها للصبح
وصفوا لي تهت وقعدت أدور مش عارفة أوصل لها ومش معايا تليفونها

قعدت على موقف العربيات لحد النهار ما طلع
رحت أدور على أي جامع فاتح لأن الجوامع ما بــ تـفـتـحش بعد الفجر غير على أذان الضهر
استحملت لما الضهر أذن، رحت جامع ودخلت اتشطفت
قعدت بقى أدور على صاحبتي القديمة
لحد ما لاقيت رقمها
قالت لي: "أنا سبت المكان ده ورحت بولاق، تعالي بولاق واقعدي معايا"
"أنا عمري في حياتي ما رحت بولاق"
قالت لي: "اركبي من الجيزة كذا وانزلى شارع المترو"
رحت قعدت عندها طبعا،
ورحت جبت فلوس من فلوسي اللي كانت معايا في السجن من البوسطة
طبعا قلت أجيب أكل وأنا جاية
قعدت الخمستاشر يوم عندها شوية، وعند واحدة تانية شوية
وطبعا الخمسمية جنيه اللي كانوا حيلتي كانوا قربوا يخلصوا، ما أنا بـ جيب أكل
أصل محدش بـ يقعد عند حد ببلاش حتى لو صاحبتي

المهم إيه رحت اشتكيت في المحكمة وقلت لهم الأمر كذا،
وبيتي جوزي أخده مني وأنا في الشارع
ما تعرفيش ربنا صلح لي الحال إزاي
الطلب اللى أخدته من القسم راح المحكمة تاني يوم على طول
رحت المحكمة تاني يوم ودخلت لوكيل النيابة وقلت له:
"أنا عندى نور بنتى قاصر وأنا حاضنة لها، وأسماء أنا حاضنة لها،
وشيرين دى مش بنته دي كان باباها متوفي كان سايبها لي عندها أربعين يوم"
لما وكيل النيابة عرف إني اتحبست في قضية وصولات قال لي:
"إيه يعني ما الناس كلها بـ تستلف"
ومشالي الورق على طول وراح باعـتـه لجوزي
كان هـ يـتـحـبـس بالمحضر اللى أنا عاملاه
ووكيل النيابة قال له: "يا تشوف لها سكن يا تطلع من السكن انت"
جوزي قاله: "ده السكن بتاع والدتي"
"خلاص شوف لها سكن"

راح قعد بقى يدورلي على سكن وجاب لي سرير
وبعت لي الشوفنيرة الطويلة اللي عاملة زي الدولاب دي
وبعت لي حبة حاجات كراكيب كده
وراح حدفني فـي أوضة في ناهيا
رحت شفت الأوضة قلت له: "لأ ما أقعدش فيها"
الفيران كانت ماشية فيها على الشبابيك

دورت لحد أما لاقوا لي شقة أوضتين وصالة
في حتة اسمها درب نصر في بولاق أبو العلا
أوضتين وصالة بس مـتـوضـبـيـن وحلوين، راح دافع لي المقدم وراح واخدهالي
وبعت لي الإيجار فترة
وبعدين رحت بقى قلت له: "هات بناتي"
كانت القضية بتاعتى خلاص
كنت أنا طلعت وما عليش حاجة
راحوا الناس بعتوا لي محامي من جمعية مصر الخير جه معايا
وخلاص أخدت البنات الحمد لله، وعملوا النفقة 200 جنيه
ما بــ تـعـمـلـش حاجة على فكرة الـ 200 جنيه

أنا واخدة الشقة دلوقتى بـ 350 جنيه إيجار، بس قاعدة فيها مبسوطة الحمدلله
بيتي على قد حالي ومش هـ قول لك فيها فرش لأ
هي فيها سريرين وتلاجة وفيها مطبخ
بقى كل ما ربنا يرزقني بحاجة ولا حد يبعت لي فلوس، أروح أجيب حاجة
رحت اشتريت بوتاجاز بألف جنيه، وبعدها اشتريت تلاجة
أنا دخلت الشقة دى يوم 28 رمضان بالظبط وبناتي جولي بعد العيد
والحمدلله وأهوه وعايشة وجوزت بنتي الكبيرة الحمدلله