اخترعت حاجة اسمها الخطوط الحمرا
وتخيلت إني بـ رسمها على جسمي
عشان أعلّم على الحدود اللي ما ينفعش تتعدى.
كانوا خطين من أول هنا لحد هنا.
ومع الوقت قعدوا يقربوا، يقربوا، يقربوا... لحد ما تقريبًا اتمسحوا
ما كانش صعب إني أتنازل عن حدودي الأولانية لأنها لعبة
أول ما بـ تدخل فيها، بـ تحس إن حاجة بـ تجيب اللي وراها
والموضوع أصلًا مالوش طعم لو ما نسيتش نفسك.
اللي كان صعب وأخد مني سنين هو آخر خط خالص
صعب أوي إنك تعملي الحاجة اللي قعدتي تمانتاشر سنة مقتنعة إنها مصيبة سودة
كنت دايما متخيلة إني لو عملت كده، كل حاجة هـ تتغير في ساعتها...
زي السحر كده أول ما يتكسر الحياة هـ تتشقلب
وانا هـ تحوّل وشكلي هـ يبقى مختلف والناس كلها هـ تعرف
خط مصيري مافيهوش رجعة... حياة تانية على ناحية تانية
ولما أخيرًا عديت … اتصدمت!
اتصدمت إني قمت وكملت اليوم عادي جدًا...
طبخت وأكلت، ودخلت الحمام، وكنت نفس الشخص مع كل الناس...
ومحدش خد باله من التأثير السحري اللي حصل!
واكتشفت إن التغيير كله كان من جوايا وما حصلش ساعتها بس،
لأ، كان ابتدى مع أول خط أحمر عديته...
مع أول بوسة...
أول مسكة إيد...
إحساس جسمي اتغير من ساعتها