أول ما دخلت السجن كنت لسه في التحقيق
وكان فيه ظابط مباحث اسمه مفيد بيه وكان قمة في الاخلاق بأمانة
جت بنت كانت بتاع عشرين سنة كده
العيال دي لحد 18 سنة يبقوا أحداث، ولما جسمهم يشد بـ يقوموا ممشينهم على السجن
حتى لو عندها 15 سنة بس جسمها شديد يودوها السجن

فالأحداث لما تضرب العيال يقوموا مرحلينها على السجن
والمساجين يلشطوا فيها
"مش انت قليلة الأدب؟ طب روحي للي أكبر منك يلطشوا فيكي"
فـ البنت دي كانت حدث
وكانت مجرمة جدا جدا، وشتمت ظابط المباحث
أنا ما عرفش حاجة
ولاقيته خد البت دي كده عند المسرح
عارفة أما تدربي حصان تجريه فـ تربطيه وتمشيه؟
أهو بقى يعمل فيها كده، ويقول لها "اجري"
وأنا أعيط بقي مـانا مش فاهمة فيه إيه!
أتاريها شتماه وقايلاله كلام وسخ
وهـ قلعك كذا وهـ عمل فيك كذا

واحدة تانية اسمها أمل قالت له: "ده انت ياد ده أنت حتة"
وحتة دي في اللغة يعني خول لا مؤاخذة
وراحت مخيطة بوقها قدام مفيد بيه
وفاتت شهور وأول ما العربية جت كانت هي أول واحدة اترحلت
قالت لمفيد بيه "انت بـ تـرحلنى ليه يا باشا؟"
قال لها: "انت نسيتى أنا إيه؟ مش أنا حتة؟!"
رحلوها سجن تاني تتبهدل هى وأهلها فيه
ما هي متبهدلة ومتنيلة مسجونة
إنما الأهالى بـ يتمرمطوا كمان، وبدل ما كانوا بـ يدفعوا خمسة جنيه مواصلات
ولا عشرة جنيه، يدفعوا بقى مواصلات سفر ويتمرمطوا
ده غير التفتيش
لكن سجن القناطر كل حاجة بـ تخش وهناك بيع وشرا وكل حاجة
أما تروحى بقى سجن تاني مفيش الكلام ده

ومرة كان فيه خناقة في العنبر
راحوا معورين البت في وشها بعلبة الكانز جابوا وش البت كدهوه
تاني يوم الصبح صحينا على المصلحة
على البهدلة وقلة الأدب، وضربونا وحطينا
وشنا فى الحيطة واحد واحد
بعد ما اتشتمت واتضربت واحنا معاها
بقينا نشوف ملايات بتاعتنا فيها الحاجة طالعة والصويت يشتغل (يالهوي)
هدومنا وسجايرنا وحاجتنا، بس رجعت

لكن غير كده فيه أدب، وفيه ناس محترمة
كان فيه ناس بـ تطلع الزكا واحنا ف رمضان
وكانوا الموظفين يدوني حاجات أفرقها على المساجين اللي لهم أطفال
وتروح اللى ماسكة الجهاز تقول لي شوفى مين ما بيجلهاش زيارة،
مين مش عارف إيه ونراضيها
فيه حاجات إنسانية كتير جدا هناك، والرك برضه على اللي ماسك المكان

ومرة لاقيت بت بـ تقول لي "أنا ضهري واجعني وعايزة دوا كده بـ 10 جنيه"
رحت قلت لموظفة: "هاتي لي الشريط ده لأحسن ضهري واجعني"
جابته بس أتاريهم بـ يجيبوه ويحطوه فوق البرشام ده اسمه إيه
اللى بـ ياخدوه وبـ يطحنوه ويحقـنوه
هي مرة واحدة جبته وعرفت بـ يعملوا كده رحت مانعة خالص
أنا صلاة وصوم وعبادة وماليش علاقة بالمواضيع دي