كنت دايماً بـ سمع إن:
"ساعة لما يلبّسك الخاتم
هيبقى إحساسك حاجة تانية خالص"
وفضلت مستنية اللحظة دي
ولما جت، كنت بـ تمني إن الأرض تتشق وتبلعني!
إيه كل الناس دي، وليه باصين عليا؟
وليه أول مرة يبصوا عليا، تكون وأنا بـ لبس الخاتم ده؟
كنتوا فين قبل كده
مانا بقالي سنين عايشة
هو أنا ما عملتش حاجة في حياتي تستحق إنكم تبصوا فيها عليا
غير لبسي للخاتم ده؟
بعد الخطوبة كل مرة كنت بـ قابل فيها حد
كان يبص علي إيدي ويقول: "مبروك"
وفيه كانوا يقولوا "برافو عليكي"
بعد شهر كرهت الخاتم
حسيت إني لابساه عشانكم مش عشاني.