بيقولوا إني قليلة الأدب

بيقولوا إني قليلة الأدب

من بعد الطلاق
أمي بـ تحرق دمي طول الوقت
لو اتكلمت وهزرت، تقول:
"هي من ساعة الجوازة التانية دي بقت قليلة الأدب"
و تقول الكلام ده قدام خالاتي واخواتي، حتى خطيب أختي.

بـ قعد أفكر أعمل فيها إيه؟
ما أنا لو رديت عليها هـ يقولوا إن أنا قليلة الأدب صح
طب اسكت؟ دمي بـ يتحرق
بـ قعد أفكر، هو صحيح كلامهم صح؟
هو أنا صحيح بقيت صايعة وقليلة الأدب؟
أنا ما بـنامش غير بعد تفكير تلات أربع ساعات
مع إني ما عـمـلـتـش حاجة عشان يتقالي الكلام ده.
هي ليه بـ تقول عليا قليلة الأدب؟
هو ليه محدش مقدَّر إني تعبانة؟


متضايقة عشان كل ما أروح عند حد يسأل:
"هو أنتِ إيه الـلـي مقعدك؟ أنتِ مش هـ تتجوزي؟ "
وناس مش قريبة
يعني مثلا، ابن عمة أبويا يقول لي:
"أنتِ هـ تقعدي لنا ليه إن شاء الله؟"
وكل ما أغلوش عليه يقول لي:
"أنتِ مش بـ تردي عليا ليه؟"
قولت له: "جربت حظي مرتين ومش عايزة تاني"
قعد يرص لي: "لا أنتِ أول ولا آخر واحدة اتجوزت
ده فيه بـ يتجوزوا بالستة والسبعة "
بصيت لمراته وسكت.

روحت عند ستي، قالت لي:
"أنا عايزاكي تـتـسـتـري وتـجيبي أخ للبنت"
قولت لها: "هو فيه إيه؟ أنتوا عاملين حفلة عليا؟"

خالتي بقى:
"ياختي اتجوزي، ده الـلـي زيِّك لسه ما شافوش دنيا"
سبتهم وطلعت عند نسوان خيلاني،
لاقيتهم زي ما يكونوا متفقين كلهم مع بعض
وكلهم لازم تـ تجوزي.
قلت لهم: "أنا كفاية عليا بنتي، عاوزة أربِّيها وأعلمها وخلاص"

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر