أكنها أم وأب

في واحدة أعرفها متجوزة بقالها 12 سنة،
هي من أول ما اتجوزت وهي بـ تشتغل، وجوزها كمان بـ يشتغل،
هي مش معاها عربية، فـ بتضطر إنها تروح شغلها بمواصلات أو أوبر أو أي حاجة كده،
بس طبعًا زمان ما كانش فيه أي حاجة تانية غير مواصلات أو مترو يعني.
البنت دي أكبر مني بـحوالي 8 سنين مثلًا،
جابت بنتها، وكانت برضه بـ تشتغل،
وبعد 5 سنين جابت ولد تاني.

الفكرة بقى إن هي في البيت أم وأب،
بـ تذاكر، وبـ تجيب، وبـ تودي، وبـ تشتغل، وما معهاش عربية.
وفي حضانة، وفي مدرسة، وفي درس بعد المدرسة، وفي بيت المفروض إنها تاخد بالها منه،
وكل ده بمواصلات، وجوزها معاه عربية.
ما فكرش مثلًا إن هو الـلـي يودي أو يجيب،
أو يقول لها خلاص أنتِ روَّحي، وهاتي الولد
وأنا هـ جيب البنت مثلًا من الدرس أو المدرسة، أو أشوف المشاوير بتاعة البيت، أنا الـلـي أعملها.
لأ، هي مطلوب منها إن هي تعمل كل ده، وتاخد بالها من بيتها،
وتاخد بالها من نفسها، وتاخد بالها من جوزها،
تذاكر لبنتها الكبيرة، وطبعًا كل الحاجات الـلـي بـ تتعمل في البيت تعملها.

للأسف هي يعني 38 - 39 سنة، بس الـلـي يشوفها ما يديهاش أكتر من 18 سنة،
جسمها ضعيف جدًا، ما بـ تهتمش بنفسها،
ما عندهاش وقت تعمل أكل لها الصبح تاخده معاها الشغل،
وفي الآخر بـ يشتكي منها إن هي مقصرة معاه، ومقصرة مع البيت،
والبيت مش على المستوى الكفء، يعني النظافة المفروض تبقى أحسن،
والأكل اللي بـ يتعمل المفروض يبقى أكل على طول فريش أول بأول يعني.
طبعًا ده مأثر عليهم، ومأثر جدًا على نفسيتها، ومأثر جدًا على صحتها.

النقطة الـلـي أنا قصدي عليها إن هي أكنها أم وأب.
الأب موجود، ما بـ يديش حتى حنان لولاده،
ولاده حاسين إنه مش موجود،
"هو دايمًا مش موجود معانا ليه؟ هو بـ يعمل إيه؟"
هو مش موجود، حتى الفلوس، هم الاتنين نفس المرتب.
فأنت إيه الزيادة الـلـي بـ تعمله في البيت أكتر منها؟
هو لأ، حاسس إن هي مقصرة جدًا،
هي مش الشخص الـلـي ممكن تبقى قايمة بالبيت،
ويقدر يفتخر بيها والكلام ده.
طبعًا لولا إن هي مسيحية كان زمان الموضوع انتهى من بدري يعني،
بس للأسف الموضوع مستمر.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر