من كام يوم رحت لخالي، كنت بـ زوره
خالي ده مقتدر لما ظروفي بـ تبقى وحشة بـ روح له
لاقيت خالتي اتصلت وقالت لي: "خالك بـ يقول منال ما تـجـيـش عندي تاني"
"ليه هو مستعر مني؟"
"مش عايزك تروحي له"
"هاتي رقمه أكلمه"
"ليه؟ هـتقولي له إيه؟ ما انت لو زعلتيه ده برضه أخويا"
وخالي التاني ده مليونير قاعد في العمرانية، فاتح فرن وورش، وبـ يدخل مزادات
أروح له عشان آخد منه فلوس وتكون أمي مـكـلـمـاه بالتليفون، يروح مديني 100 جنيه يتيمة
ويشتم فيا ويقول لي: "مفيش حريم تيجي هنا تاني، أنا هـ بعت لكم مع أخويا محمد"

خالي ده مع إنه مقتدر ساب أمي في أوضة زي أوضة التأديب
بعد ما كان عندها شقة أوضتين وصالة، وشقة تانية أوضة وصالة
كل ده اتباع علينا وأنا وأخويا في السجون
وجهازي كمان بقت تنزل الحاجة وتـبـيـعـهـا عشان تجري علي المحامين

محدش وقف جنبها، ولما راحت لخالي تطالب بحقها عشان توقف محامي ليا ولأخويا
قال لها: "اتنازلي عن ورثك كله وخدي ألف جنيه،
تطلعي تنزلي تولعي في نفسك هي ألف جنيه اللي هـ تاخديها"
في الآخر ما عـرفـتـش تدفع فلوس محامين

أصل أنا وأخويا كانت قضيتنا كبيرة
أخويا اتاخد قبلي بعشر أيام
أخويا كان معمول له 25 كيلو بانجو، وأنا تربتين ونص حشيش، وعشرة كيلو بانجو
كانت عايزة تجري على حد فينا تخرجه
ساعتها كان مكتوب كتابي وهـ نجد يوم الخميس، اتاخدت الأربعاء
فكل ما خطيبي يسأل عليا تقول له: "دي عند خالتها أصل خالتها تعبانة"
"عند عمتها أصل عمتها تعبانة"
قلت لها: "يامه قولي له الصراحة. أنا بقالي 3 شهور في السجن"
فأمي عملت كده وقالت له الصراحة
جه وقال لي: "ما قـلـت لـيـش ليه إن أخوكي بـ يبيع مخدرات؟ ده احنا لينا تلات سنين مع بعض"
قولتله: "محدش بـ ياخد أكتر من نصيبه، شوف حالك وأنا هـ شوف حالي"

طلقني وأنا لسه في التحقيق، وجالي بعد ما اتحاكمت بسنة يقول لي:
"أنا بحبك وعايز أرجع لك. وشقتنا مقفولة على العفش اللي انت مختاراه. أنا عايز نرجع"
قلت له: "لأ مش هـ ينفع، انت طلقتني وأنا لسه تحقيق،
جي دلوقتي لما اتحكم عليا بعشر سنين عايز ترجع لي، ما تـضـحـكـش على نفسك انت شوف حالك وأنا هــ شوف حالي"

المواقف كتير ...
لما خرجت واحدة في البيت عند أمي عايرتني بالسجن وقالت لي: "جرى إيه يا رد سجون"
ساعة ما تيجي تتخانقي مع حد تلاقي اللي يعايرك بالكلمة دي

أنا نفسيتي تعبانة بسبب اللي حصل لي كله
وأنا في السجن شفت حاجات كتير
مرة كنت قاعدة في عنبر الإعدام تأديب
كنت مصاحبة واحدة اسمها نهى الله يرحمها
قعدت في التأديب تلات أيام
حطوا لي شاي وسكر والتانية طلعت لي سجاير
كنت قاعدة بـالسـنـتـيـانـة والكلوت، الجو كان نار
وحاطـيـن لـنـا حتة موكتة مليانة شعر قطط بقيت قاعدة بـ هرش
جه عليا الليل السجانات كلهم اتفرشوا ناموا وأنا قاعدة مش عارفة أنام
لغاية الساعة واحدة ونص عيني غفلت لاقيت صوت بـ ينده عليا اتخضيت
ما عرفتش أنام لغاية الصبح
أول مـ السجانة فتحت الباب قلت لها: "خرجوني ودوني أي تأديب تاني أنا مش هـ قـعد هنا"