انتِ جميلة …
أنا مش جميلة زيك
انت هـ تبقي مبسوطة؟
هو بـ يحضنك؟
مش هو بـ يحبك؟ قال لك؟ انتِ متأكدة؟
انتِ مش خايفة؟
مش خايفة بعد الجواز تصحي تلاقي نفسك ولا متونسة ولا نيلة
ولسه قاعدة تفكري في فارس الأحلام اللي بـ يطلع في الأفلام ومش بـ ييجي أبدا؟
هـ تعملي إيه لو لاقيتي نفسك وانتِ قاعدة مع جوزك
بـ تتفرجي على فيلم وابتديتي تفكري في البطل …
طب وجوزك؟ كيس جوافة؟
أنا لو ده حصل لي هـ حس بالذنب وممكن أطّلق …
بس هـ قول للناس إيه؟
اتطلقت علشان شاروخان أحلى من الراجل اللي أنا اتجوزته؟!
