أنا قاعدة في شقة أبو العيال، دي مشكلتي …
بعد ما خرجت عيالي كلهم اللي اتجوزوا واللي اتخطبوا
والناس فاهمين إن باباهم محبوس سياسة،
وأنا كنت معاه في البلد اللي هو كان فيها قاعدة بـ خدمه،
أي حد من نسايبنا عارف كده لأن هو هـ يخرج وهـ يظهر في حياتنا
طيب هـ نقول هو كان فين؟
فـكل قرايبنا وناس من نسايبنا اللي أصغر مني عارفين إنه كان محبوس
لأن أولادي ربوهم أبويا وأمي مع أخواتي
لما كان حد يسأل: "أمهم فين؟"
يقولوا: "أبوهم محبوس سياسة، وأمهم بـ تشتغل في البلد اللي هو فيها عشان تخدمه"
أيام بقي السياسة الجامدة قبل 2011،
لما كانوا بـ يعتقلوهم ومحدش يعرف طريقهم فين

أنا ليا صاحبة لما بـ روح لها بـ يكون عندها ناس وكلهم كانوا محبوسين
بس هـم مش عايزين السيرة دي تيجي تاني
فقالت لي: "محدش يعرف أنا عارفاكي منين، أنا عارفاكي عن طريق شوشو اللي هي مدام منى"
واحدة هناك سألتني: "انت تعرفيها من فين؟"
فقلت لها: "لأ ده أنا بـ شتغل عند مدام منى وبـ جيب لهم الطلبات"

أيوا الموضوع ده احنا ما بـ نـتـكـلـموش فيه،
حتي إجواز ولاد أخواتي ما يعرفوش إني اتحبست،
هو أنا يمكن أكتر واحدة محبوبة في العيلة وفي وسط أخواتي
لأني بـ استضيفهم وبـ عمل لهم اللي بـ يحبوه والكلام ده
بس هـم يا حرام, بيقولوا لي: "النقطة دي ما تـتـكـلـمـيـش فيها"
فيه ناس عارفة طبعا، نسايبنا القدام، لأن أصلا جرالي اللي جرالي وهـم موجودين
لكن كل نسايبنا الجداد عارفين إن أبوهم محبوس سياسة ومعتقل،
هـ يطلع امتي؟ الله أعلم

مرة خرجت مع أختي الصغيرة فحصل مشكلة، المشكلة مش بتاعتي أنا،
فأختي اللي أكبر مني قالت لي: "انتِ طالعة تـنـتـقـمي مننا"
أنا بقى سيـبت كل حاجة وقـفـشـت في الكلمة دي
"طيب أنتقم منك ليه؟ هو انت اللي حـبـسـتـيـني أو انت السبب؟"
وأنا محبوسة محدش كان بـ يجي لي غير أمي وأبويا بس،
وأخواتي كل واحدة فيهم جت لي مرة،

ليا خال ما جاليش ولا مرة ولا حتى والدتي كانت تيجي تقول لي
ده خالك بـ يسأل عليكي أو أختك باعتالك ده، لا مفيش الكلام ده خالص،
عمرها ما جت قالت لي أختك عاملة لك أكل ولا خالك بـ يقول لك خدي الجنيه ده،
أو علبة السجاير باعتهالك خالك،
خالي أول ما خرجت تعب فقالت لي: "روحي زوريه"
قلت لها: "هو انت عمرك جيتي قلت لي هو بـ يسلم عليكي"
كانت تيجي تقول لي ده مين من جيرانك بتسلم عليكي،
أما توفي قالت لي: "أهو مات بسببك".