أنا جت لي البيريود وانا في أولى إعدادي،
شوفت دم في الهدوم وانا عند جدتي،
جريت على الحمام غسلتها، وخوفت أحسن أكون اتعورت،
وماما ممكن تضربني، أو تقول لبابا ويضربني.
اكتشفت إنه الدم بـ يزيد، وكل شوية ينزل،
حكيت لبنت عمي، قالت لي: "مبروك، أنتِ كبرتي".
لما روحت حكيت لمامتي، وأول كلمة قالتها لي: "دم؟ دم إيه؟ حد لمسك؟
انطقي، قوليلي مين عمل كده"، بزعيق مش طبيعي.
أنا خوفت منها ومن رد فعلها الـلـي قتلني ساعتها،
وقولت لها: "بنت عمي بـ تقول إنه أنا كده كبرت" وانا مفلوقة من العياط.
كان ردها: "هـ نشوف الشهر اللي جي كبرتي ولا حصل حاجة وخايفة تقولي".
أعتقد مفيش مأساة أكتر من دي، ولا رد فعل أقذر وأصعب من ده.