احنا خلصنا تعليم وكلية، ففيه ناس بـ تسأل: "ما اشـتـغـلتـيـش ليه؟"
وناس تسأل: "ما اتـخـطـبـتـيـش ليه؟"
بس الأغلب بـ يسأل: "ما اتخطـبـتـيـش ليه؟"
أهلي مش كده، أمي عنديها تقول البنت أهم من إن هي تتجوز
تبقى شهادتها في إيدها وبعدين شغلها
ده سلاحها اللى هـ ينفعها
حتى يعني لو اتجوزت وجوزها حصل بينهم أي حاجة مثلا
يبقى شغلها هو اللي هـ ينفعها

مش يمكن إن أنا مثلا مش حابة أتخطب وحابة أشتغل؟
يمكن يعني حابة إن أنا يبقى عندي شغلي
وناجحة فيه وبحبه أكتر من إن أنا أتخطب؟

بس السؤال بـ يبقى باستفزاز:
"انتِ ما اتـخـطـبتـيـش ليه؟ انتِ مخلصة بقالك قد إيه؟ انتِ كان كليتك في قنا؟
آه، ما انتِ قاعدة لك 4 سنين هناك.
ده الراجل يومها شاف أختك الصغيرة كنت سمعاه بـ يقول لأمك
'انتِ عندك بنت تانية؟ أنا كنت فاكر دي بس اللي عندك!'
ما انتِ اتغربتي بقى وقعدتي 4 سنين هناك فـالناس نسيتك أصلًا،
آه، ما انتِ كل شوية شغالة تخرجي لي مع أصحابك
عارفة لو تمشي مع مامتك كده في الشارع
ولا خالتك علشان لو حد شافك كده يعرفك ويتقدم لك،
لكن انت قاعدة تـتـنططي في الشارع مع أصحابك"

والكلام ده ممكن يتقال لي من أي حد،
ممكن من واحدة صاحبتي، واحدة قريبتي
أى حد كده عادي يعني، كلام عادي

واللي تيجي مثلا تتصل بماما وماما تصحيني من النوم
تقول لي مش عارفة مين قريبة مين جايبة لك عريس
أنا: "أيوا اللي هو مين يعني؟"
ماما: "بـ يقولوا مش عارفة شغال إيه وبتاع إيه"
أنا: "أيوا يعني أنا أعرفه؟ هو شافني؟"
ماما: "لأ عادي هو عايز عروسة وكده"
أنا: "قولي لها لا طبعًا"

أنا نفسي أتجوز حد بحبه طبعا
حتى لو مش هـ بقى بحبه
يبقى مثلا على الأقل عارفاه، شوفته مرتين تلاتة خمسة
أعرفه، أعرف حاجة عنه مش حتى أعرف كل حاجة
لكن فكرة إن الواحدة عشان خاطر سنها مثلا، ولا عشان الناس كلها بـ تسألها فـتتخطب وخلاص؟
عشان هو حد شغله كويس وسنه كويس وكل الحاجات دي كويسة وخلاص؟

"روحتي فرح صاحبتك؟ كان فيه ولاد حلوة هناك؟"
"دلوقتي مين فضل في الشلة غيرك انتِ كده؟"
الكلام مستفز.
أنا ما عنديش مشكلة أتخطب بكره أو بعد عشر سنين أصلًا
عادي وقت ما يــيجي تمام
فيه ناس كتير اتجوزت صغيرة وناجحين في بيتهم وكويسين ومكملين حياتهم
وناس تانية اتجوزت صغيرة وحياتهم مثلا ما تظبطتش
وفيه ناس اتجوزت كبيرة وبرضه ما شاء الله وكويسين
وناس برضه اتجوزت كبيرة وعندها شوية مشاكل
يعني قصدي إن دي طبيعة البشر

تدخل الناس فى الآخر بـ يضايق كل واحدة فينا
ضغط الناس وكلامهم والزن والأسلوب والحاجات دي

إنما أنا مش بـ تضايق
بالعكس أنا بـ ضحك لما حد بـ يقول لي أختك الأصغر منك اتجوزت
طب أنا مبسوطة لأختي أصلًا وفرحانة عشانها
ليه أبقى متضايقة إن أختي الأصغر مني متجوزة؟
واللي بـ يقول لي حاجة بـ رد عليه بتريقة:
"هي أصغر مني بأربع سنين، يالا بقى عايز حاجة تانية؟"