بصي، أنا كنت مُبرمجة أصلاً،
من وقت ما اتخرجت، اشتغلت سنة واحدة بس في وظيفة ثابتة.
بعدين قررت إن أنا هـ بقى فري لانس، عشان لما اتجوز اشتغل من البيت.
ده فكر عمومًا جديد،
وفي نفس الوقت أنا مش محتاجة أروح أقعد على مكتب عشان أنجز الشغل،
أنا ممكن أبقى بشتغل في الأوقات المناسبة ليا، وأنا لابسة البيجامة، وبعدين أروح أسلم الشغل.
بـ قابل الـعملاء في أوقات معينة،
خصوصًا إن أولادي كانوا لسه صغيرين يعني، كان لسه ابني بيبي،
فـ كان لازم أكون معاه غالبية الوقت، هـ سيبه فين بقى؟
مش عايزة أتجه اتجاه إن أنا أودِّي حضانة وكده.
بعدين غيرت شغلي خالص لتصميم المجوهرات،
بعدين غيرت تاني للعلاج بالأحجار لانه كلنا عندنا طاقة سلبية ،
أنا في الحقيقة بـ سمع عن الـعلاج بالطاقة بس عمري ما كنت جربتها،
كنت حاسة إنه لأ، ده مش حقيقي، أكيد ده نصب وحاجات كده.
جربت في مرة بقى جلسة ريكي reiki،
وحسيت إنه ده بجد ده حاجة حقيقية.
أنا طول عمري بحب الأحجار والكريستالات، بس بحبها بألوانها،
يعني شكلها حلو وألوانها حلوة، وبعدين عرفت إنه في حاجة اسمها crystal healing،
طب ما أدور فيها،
المهم حسيت إنه في فرق يعني اللحظة اللي عملت فيها الجلسة،
حسيت إني اتغيرت خالص.
فضلت بقى أدعبس ورا الموضوع، وعملت الدبلومة بتاعتي اون لاين.
أنا حاليا بـ شتغل معالجة وعندي سنتر للعلاج بالأحجار،
وبـ روح سنترات، وبـ روح شركات، والناس بـ تيجي لي،
وانا بـ روح لهم ،
قادرة أشتغل معظم الوقت وأولادي في المدرسة،
بـ تحكم في وقتي، يعني بـ قول لأ أنا هـ قدر أشتغل الصبح، ما أقدرش أشتغل بعد الظهر.
أنا ولادي في مدارس وبـ يلعبوا تنس،
كل واحد عنده بقى التمارين بتاعته، وعنده البطولات بتاعته، وبنتي نفس الحكاية.
وقدرت يبقى ليا الحمد لله سمعة حلوة كمعلاجة بالأحجار ومصممة إكسسوارات،
في نفس الوقت أنا عندي دخل، وعندي شخصية لوحدي،
وأم لأني موجودة مع ولادي من وقت ما بـ يكونوا في البيت، لغاية ما بـ يروحوا تمارينهم،
قادرة أمارس حياتي معاهم كأم،
وفي نفس الوقت ليا وضع كبير في شغلي.
فأنا مش شايفة إن عشان أكون أم عاملة لازم أكون بـ روح أقعد على مكتب،
ممكن الواحدة تشتغل فري لانسر،
يعني أنا خلاص دلوقتي ابني قرب يدخل الجامعة، وقاعدين بـ نفكر في شغلانات،
طب إيه الكارير الـلـي من بدري ممكن يدرسه؟ هو لازم يبقى دكتور ومهندس؟
لا دلوقتي مدربين اليوجا بقوا بـ يكسبوا أكتر بكتير من المهندسين والدكاترة،
فـما بقاش لازم تبقى دكتور ومهندس.