قصتي مش عنف مادي، لأ، معنوي….
اتجوزت وانا 21 سنة،
كان أول واحد أتكلم معاه؛ لأننا اتربينا على كده.
كنت مهتمة بنفسي جدًا.
من أول جوازنا خناق، وشتيمة، وحسسني إني عندي 100 سنة.
تخنت، وصلت لـ 120 كيلو،
أهملت نفسي جدًا.
كان بخيل ماديًا ومعنويًا….
الأول، كان بـ يقول مش معاه فلوس،
وقفت جنبه، وساعدته، وقولت كله لولادي،
لغاية لما عرفت إن معاه ملايين، ومش راضي يرجع فلوسي،
مفيش كلمة حلوة.
كنت بـ شوف أي اتنين مبسوطين، واعيط على الـلـي وصلت له،
مفيش عنده غير: "أنتِ فاشلة".
لغاية لما فوقت لنفسي بجد، بس طبعًا بعد إيه؟
17 سنة جواز.
اهتميت بنفسي، وبـ حاول اشتغل، وطلبت الطلاق،
هو رفض.
دلوقتي عايشين منفصلين كل واحد مع نفسه،
وبصراحة، بـ كرهه جدًا….
مش قادرة أبص في وشه، ولا يلمسني.
أول مره أكره حد للدرجة دي،
مكـمِّـلـة عشان الأولاد بس.