بيخافوا يمسكوا إيدي

أنا بنت، 22 سنة، عندي مشاكل كتير جدًا متعلقة بشكلي….
أنا وزني زايد، وأُعتبر أتخن بنت في العيلة،
ومن صغري وبـ تعرض لكلام كتير من نوعية إنك "ليه مش رفيعة؟"،
و"طالعة تخينة لمين؟"، و"بـ تاكلي أكل أخواتك"،
وكتير من السخرية، والتنمر المكرر، والـلـي بـ يمر بيه غيري كتير.

عندي مشكلة تانية في حساسية بشرتي،
وإني طول الوقت عندي حبوب في جسمي، وإيدي، ووشي،
بحُكم إنهم متعرضين للشمس دايمًا.
أفتكر وانا في المدرسة في الطابور كانوا زمايلي بـ يخافوا يمسكوا إيدي،
وكنت بـ روح متأخر عشان أقف في الآخر لوحدي.

حاولت مع دكاترة كتير لحد دلوقتي، بس مفيش نتيجة؛
هي حاجة مش بـ تتعالج، ومضطرة أتعايش معاها،
وافضل أستحمل كلام وشفقة من الناس، وتعلقيات على بشرتي طول الوقت.

عندي كمان مشكلة مع شعري وإنه كيرلي،
و"مش طالع ناعم زي مامتك ليه؟"، مع إني بحب شكله جدًا،
وحقيقي لما بـ فرده واسمع تعليقات الناس عن "قد إيه هو كده جميل"،
و"خليه كده على طول"، بـ تضايق، ومش ببقى حابة شكلي بيه،
بس كمان الكلام بـ يخليني مش مبسوطة، ومش عارفة أحب نفسي.

أنا مش عارفة أحب نفسي زي ما أنا،
وطول الوقت ما بين دايت، ودكاترة جلدية، ومنتجات للشعر، وكأن ده كل هدفي في الحياة.
أنا بحب دراستي، وبـ تمنى أنجح فيها،
بس أنجح إزاي وانا حتى النزول للكلية تقيل عليا كده؟

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر