عندي اضطراب أكل

أنا عندي اضطراب نهم الطعام -binge eating disorder- من وانا طفلة،
ما بدأتش أوعى له أو آخد خطوة في إني أعمل حاجة فيه إلا لما بقى عندي 21 سنة.
وبدأت أزيد في الوزن من وانا عندي 10 سنين،
غير إني كنت كل أسبوع عند دكتور تغذية،
وكل يومين ماشية على دايت شكل، حبوب وأدوية.

مامتي تجاهلت كل محاولاتي لشرح إن مشكلتي أكبر من الأكل،
كانت شايفة إني ما عنديش إرادة كفاية، وبـ تدلع، ومش عايزة أحرم نفسي من الأكل في سبيل الخسسان.
مامتي محافظة على جسمها وأكلها جدًا،
ولما بـ تحس إنها أكلت كتير، بـ ترجَّع الأكل.

حصل كذا مرة وانا عندي 16 سنة إننا نكون في مناسبة عائلية،
وإحنا قاعدين كلنا بـ ناكل، تشيل من قدامي الطبق قدام الناس،
وتقول لي: "كفاية أكل" بصوت واطي، على أساس إن محدش هـ يشوف ولا هـ يسمع.

جربت برضه كذا مرة تقفل التلاجة بالمفتاح لما تروح تنام، عشان ما آكلش بالليل.
حاولت كتير أتكلم معاها في فكرة إن الموضوع مالوش علاقة بالعزيمة والإرادة،
وليه العلاج النفسي أساسي دلوقتي،
وبرضه كل زيارة للدكتور كان بـ تبدأ خناقة بيننا.

ده غير طبعًا المضايقات اليومية بتاعة: "هـ تخسي إمتى؟"
على أساس إن المفروض أدي ميعاد محدد،
أو التعليقات الـلـي من تحت لتحت من ناس كتير.

دلوقتي أنا بـ حاول أفصل صوت مامتي، وصوت الناس عني،
وافهم إنه الـلـي هم بـ يقولوه مش لازم يمثلني.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر