أول ما جت لي الدورة كنت في أولى اعدادي تقريبًا،
كنت ما أعرفش إيه دي، وافتكرتني اتعورت،
بس لاقيتني مش حاسة بوجع، جريت غسلت هدومي،
وبقى كل شوية الدم يزيد بطريقة مريبة.
روحت لماما قلت لها: "ماما، هو في إيه؟ أنا خايفة"،
وكنت بـ عيط من كتر ما أنا خايفة ومش فاهمة،
بس هي حاولت تطمني، وفهمتني إني كده معناه إني كبرت بطريقة يستوعبها عقلي في السن ده.
قالت لي ساعتها: "ما تـقـلـقـيـش يا حبيبتي، هي بس هـ تجيلك كل شهر؛
علشان ده طبيعة جسمك. من دلوقتي هـ تعملي يومك العادي، ولا كأن فيه حاجة،
وهـ تروحي مدرستك، وتلعبي مع صحابك براحتك برضه،
ولو حسيتي بأي وجع في مرة، تعالي قوليلي، وأنا جنبك يا روحي".
ولحد دلوقتي وانا عندي 20 سنة لما بـ تيجي لي الدورة، وبـ توجعني،
بـ روح أقول لها، وتفضل جنبي لحد ما أهدى شوية.