وقتها كنت كبيرة شوية، كنت تانية إعدادي وماما أخدتني لدكتورة نسا،
والدكتورة قالت نصًا "دي مش محتاجة طهارة".
أنا كنت واعية وفاهمة هم بـ يقولوا إيه، وعايزين يعملوا فيا إيه،
وقولتلهم: "خلاص الدكتورة قالت مش محتاجة"،
وردت خالتو: "هي الدكتورة دي هـ تـفهم أكتر مننا،
عايزين البنات يطلعوا هايجين (والفاظ تانية كده) احنا نشوف داية تعمل كده"
ويومها أخدوني وقالوا لي: "هـ تشوفك بس".
دخلت ورشت بنج، بس حسيت بكل حاجة، والدم كان كتير جدًا،
والست قالت لأمي: "بنتك هـ تتعب"، قالت لها: "آه ما هي عندها سرعة ترسيب"
والست تقولها دي بـ تنزف جامد!
وأخدوني علي مستوصف قريب، ومش فاكرة حاجة بعدها ...
بس الغريب إن بعدها لاقيت مكالمات من كل ستات العيلة،
بـ يكلموني يباركولي، و"ألف مبروك يا حبيبتي أخيراً اتطاهرتي"
بجد؟! انتوا ناس طبيعية؟
ومن وقتها وانا فعلا بقيت مستثارة جدا، وبـ عمل العادة بشكل غير طبيعي، وممكن بشكل يومي ..
نَفسيًا وجسديًا تعبت، تعبت من الجهل والقرف ده،
ومش قادرة أسامحهم على اللي عملوه.
مش قادرة أنسى وهم شايلني، والدم بـ ينزل مني، وبـ صرخ جامد،
ولا حد فيهم فكر ياخدني في حضنه،
كل اللي قالوه "بطلي صريخ هـ تفضحينا"،
بجد؟ هـ فضحكم؟ ده اللي قدرتوا تقولوه؟
سكتت وانا صغيرة عشان ما أفضحهمش،
بس دلوقتي مش قادرة أبطل صريخ من جوايا كل ما أفتكر