مش قادرة أفضل معايا

مش قادرة أفضل معايا

نوم طول الوقت، أو مفيش نوم لأيام
عياط وماليش نفس لحاجة، لأي حاجة، حتى النَفَس نفسه مش طايقاه
مش عارفة أشوف شغلي
مش طايقة أي حد
بـ سقط في دراستي كتير، بـ خسر صحابي
مش لاقية حد يفضل، وعندهم حق
أنا مش قادرة أفضل معايا.

بدأت أشوف إني ما أسـتـحـقـش حاجة حلوة
ولا إني حتى أستحق أعيش
محدش معايا، رغم كل الـلـي معايا
شايفة الشفقة في عين كل حد بـ يحاول يساعدني
حاسة بالعجز، وقلة الحيلة، وقلة القيمة
لا جدوى لأي حاجة
أصلًا أنا موجودة ليه؟

روحت لدكتور، كنت بـ مشي على الدوا يومين وابطله
اكتئاب واضطرابات تانية، بـ أذي نفسي جسديًا ومعنويًا
محاولات انتحار كتير، كلها بـ تـنـتـهي بمستشفى
و"أنتِ ناقصك إيه عشان تعملي كده؟"
ناقصني أنا، أنا مش شايفاني، ولما بـ شوفني بـ شوفني أبشع كائن اتخلق.

شاكة في كل حاجة
بـ كره العالم بمجمله وتفاصيله
بـ قرب من ربنا، ما بلاقيش إجابة، بس مستنياه يمد لي إيده
بـ حاول أقول إنه أكيد هـ يساعدني، أكيد هـ بقى أحسن.

بـ حاول أنتحر، وادخل في غيبوبة، أفوق بعدها، واحاول أمشي شوية بـ بقى أحسن.

أنا دلوقتي أحسن في خطوات حياتي، بحاول أحيى
بس لسه الاكتئاب مرافقني زي ضلي، وبـ حاول، بـ حاول.

الاكتئاب مرض قاتل، محتاج مساعدة ودعم كبير
بـ اتمنى أي حد بـ يـعـاني منه يـ تخلص منه
ويلاقي حب، وأهل، وصداقات تساعده في ده.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر