أنا مولودة عندي نسبة حَوَل في عيني، يقال إنها بسيطة،
بس للأسف عاملة لي مشكلة، وأزمة نفسية،
لأن الناس كلها لما بـ تكلمني بـ تبص في عيني مباشرة.
ناس كتير سألتني: "هو أنتِ كنتي لابسة نضارة؟"
أنا في الحقيقة نظري ٦/٦ الحمد لله،
لكن الموضوع ده بـ يكرهني في نفسي،
وكل صوري بـ تكون بالجنب، أو نص وشي بس.
كنت مخطوبة لواحد كان شايف إنه لما يقولي:
"لا ما تـسـبِّـلـيـش وتحولي كده"، ده هزار،
بس أنا كنت بـ تعذب لما حد يركز في النقطة دي،
ده غير إني اتعرضت للتنمر كتير أيام المدرسة.
كل ده على قد ما كان صعب،
على قد ما دفعني إني اجتهد، وادخل كلية قمة، واتفوق فيها،
واشتغل شغل، واتنين، في أماكن مرموقة.
ولما روحت عيادة العيون أطلب من الدكتور يعملي عملية،
مهما كانت هـ تعالج الحول ده، رفض،
لأن نسب نجاحها معدودة.
بس بـ حمد ربنا وبـ شكره ألف مرة،
خصوصًا بعد ما شوفت ناس محرومة أصلًا من نعمة البصر.