كنت حجمًا صغيرة من الطفولة للجامعة،
وكان ليا أخويا أكبر مني بسنة، الفرق كان صغير أوي،
بس قبل سن المراهقة، جسمه اتغير، وانا زي ما أنا.
وعندي أخت أصغر مني بـ 8 سنين،
الإتنين أحجامهم حلوة، ومليانة، إلا أنا، كنت رفيعة.
كل لما حد يشوفنا سوا: "إيه ده؟ هم بـ ياكلوا أكلك؟"
"ما بـ تعملوش أكل في البيت؟"،
"إحنا نحطكم في الخلاط، ونطلع ناس مظبوطة"،
"شركة القصب عايزة زعازيع"،
"خشب الله عبد الناشف"، إلخ.
كأن الموضوع بإيدي، وانا السبب….
"أنتِ ضعيفة"، "أنتِ ما فيكيش صحة، مش هـ تعرفي تحملي ولا تخلفي"،
"محدش هـ يبصلك، هـ يبص على إيه يا حسرة،
مش هـ يلاقي حاجة يمسكها"، كأني لعبة جنسية.
بعد الجواز، روحت لدكتور علشان أتخن،
جالي حساسية، وتعبت، وخسيت أكتر،
بسبب إن شكلي رفيع أوي،
وكأن التنمر حلال على الرفيعين.