ماما دايمًا طول الوقت تعليقات على كل حاجة:
"أنتِ عاملة كده ليه؟"،
"أنتِ وشك أصفر كده ليه؟"،
"تحت عينيكي أسمر ليه؟"،
"حوالين بُقك أسمر ليه؟"،
"بـ تاكلي كده ليه؟"،
"صوابعك طويلة ليه؟"
متخيلين مدى تأثير كل الكلام ده عليا، وعلى نفسيتي لمدة 25 سنة؟
ده غير طبعًا الشكوى ليل و نهار مني لكل الناس،
رغم إن أنا أعتقد إني مش وحشة أوي كده.
طبعًا أنا عارفة إن هي عايزاني أبقى حلوة،
بس هي تجهل الطريقة الـلـى تعمل بيها كده.
و نتيجة ده كله طبعًا شخصية مهزوزة، وما عنديش ثقة في نفسي نهائي،
إحساس بالفشل مسيطر عليا في كل لحظة.
أحيانا بـ كبر دماغي، وأحيانًا بـ زعل على نفسي،
وأقعد أبكي قهرًا من المعاملة الـلـي لا يوجد بها أي نوع من الإنسانية.
وفي وسط ده كله، أنا بـ حاول أكون شخصيتي،
شخصية قوية، متفاهمة، واثقة من نفسها؛ عشان أكون أُم كويسة.