أنا كنت بـ شتغل من أولى جامعة، يعني اعتمدت على نفسي من أولى جامعة،
أنا بابايا متوفي من زمان، ومامتي معاهاش،
كنت معتمدة على نفسي ماديًا وكل حاجة يعني.

خلصت الجامعة، واتخطبت، واتجوزت،
سكنت بعيد جدًا، ما كانش ينفع أروح نفس الشغل الـلـي أنا كنت فيه،
أنا كنت ساكنة في العبور فـ ما كُنـتـش مهتمة أدوَّر على حاجة تانية هناك يعني.

قعدت شوية عقبال ما بقيت حامل،
بقيت حامل في توأم، ولدت، وخلفت، وقاعدة،
كان عندي اكتئاب، قعدت سنة وشهرين اكتئاب الـلـي هو اكتئاب ما بعد الولادة ده.
ده كان انهيار، عياط هستيري، كان عليا ضغط كبير من أهل جوزي،

المهم فضلت كده لغاية ما كملوا سنتين بالظبط،
سنتين بقى وبدأت أفكر إن أنا عايزة أشتغل حاجة،
بس مش هـ ينفع إن أنا أسيبهم وأنزل شُغل،
هم صغيرين، حتى لو وديتهم حضانة هـ يرجعوا إمتى؟
وهـ آخدهم إمتى؟ وآجي لهم إمتى؟
بس لازم أشتغل،
يعني أنا قعدت 8 سنين بـ شتغل قبل الجواز، و3 سنين قاعدة بعد الجواز،
لأ مش متعودة على كده.

قررت إن أنا هـ تعلم أعمل تورَت، وأنا أصلًا ما بـ عرفش أعمل أي حاجة حلوة خالص،
قررت إن أنا لازم هـ تعلم، مروحتش اتعلمت في أي مكان،
علمت نفسي بنفسي عن طريق اليوتيوب، سالي فؤاد والناس دي.
عملت مشروع صغير، هو بقاله سنتين ونص، 3D cake و cupcakes وكده.

أول ما قولت لجوزي أنا عايزة أعمل المشروع ده،
قال لي: "إيه ده؟ أنتِ ما بـ تـعـرفـيـش تعملي أصلًا كيك، ومالكيش في القصة يعني.
لأ، اتعلمي بقى، خدي كورس، أي حاجة تانية كده تنفعك تنزلي تشتغلي فيها".
روحت باصة له كده الـلـي هو يعني ده بجد،
بـ قول لك أنا حابة إني أعمل كيك، تقول لي لأ خدي حاجة تانية مش في اهتمامي أصلًا؟

ما ركزتش معاه، عشان لو كنت ركزت معاه، كنت هـ يأس وهـ يجيلي إحباط.
في ناس كتير أصحابي شافوا الحاجات، كنت بـ جرب،
جربت كذا مرة، وكنت بـ نزِّلهم على الفيسبوك بتاعي،
الناس عجبتهم جدًا، "إيه ده بجد ده حلو جدًا"، "أنتِ الـلـي عاملاه؟"
"ده أنتِ لازم تعملي مشروع، ولازم تكملي".

الفكرة لعبت في دماغي اتعلم، وبقيت أجرب في كل الـلـي حواليا،
"مامي، تعالي دوقي الحتة دي"،
"حماتي، إيه رأيك في شكلها؟ طب دوقي الطعم"،
طب مش عارفة إيه، كل شوية أتعلم حاجة جديدة،
ما عنديش أصناف كتير، هم 4 أو 5 حاجات،
بس كل شوية بـ طورهم يعني، كل شوية بـ ضيف عليهم
طب ما نعمل حاجة جديدة، طب نحط أو نحشي حاجة يبقى شكلها مختلف.

كل شوية بـ علم نفسي، وفي نفس الوقت مش واصلة،
مش حابة إن أنا أبقى الـلـي هو الـلـي بـ عمل كل حاجة بقى،
وشرقي، وغربي، وحلو، والكلام ده، لأ.
بس وصلت لدرجة إن أنا بـ شتغل وعندي اكتفاء مادي، ومستقلة استقلال مادي بنفسي،
دي كانت حاجة هاماني جدًا بعد الجواز،
ما كُـنـتـش حابة إن أنا حتى لو جوزي مش بـ يبخل عليا، وكل حاجة والكلام ده كله،
لأ مش حابة، مش حابة إن الـلـي هو أنتِ معاكي الفيزا، وتعالي اشتري الـلـي أنتِ عايزاه،
لأ فاكس يعني، لما اشتري بفلوسي أنا هـ بقى مبسوطة أكتر،
ومش شايلة هم، أو مفكرة أو مكسوفة،
يعني أنا بقالي 6 سنين متجوزة، ولو أخدت فلوس من جوزي بـ بقى مكسوفة.

الدنيا اتظبطت معايا لما اشتغلت،
آه، بـ شتغل من البيت، ومش بـ نزل ومش بـ سيب الولاد،
يمكن أنا كنت محظوظة إن أنا بـ عمل كده،
في غيري للأسف الظروف مش مساعداهم علي ده.
مش مضطرة إن أنا اشتغل، بس أنا عايزة أشتغل.