شكلك بقى مداماتي

أنا وزني الحالي 70 كيلو، وطولي 163،
من 4 سنين كنت محافظة على جسمي،
كان وزني من 58 لـ 60 ما بـ يزيدش،
لحد ما حصلت لي أزمة في حياتي، واترفدت من الجامعة، وقعدت في البيت.

والدي ووالدتي متوفيين، وعايشة مع أختي الكبيرة،
ليا أخوات كتير، 5 بنات غيري، وولدين، كلهم متجوزين ومخلفين ما عدى أنا.
لما زدت في الوزن بقوا يعقدوني في شكلي: "أنتِ تخينة"،
"أنتِ باندا في نفسك"، "هـ تبقي زي فلانة قريبتنا".

"محدش هـ يتجوزك بمنظرك ده"، "شوفي لغدك"،
"شكلك بقى مداماتي، كده ما ينفعش"،
"جسمك المليان يتفهم غلط"، وكلام كتير من نوعية:
"بصي فلانة اتجوزت وأنتِ لسه عشان شكلك، خسي عشان يجيلك ابن الحلال".

معلومة هامشية، قريبتنا دي بنت عندها 20 سنة،
كان وزنها 160 كيلو، وخست بقت 90 كيلو، وعملت عملية تجميل في جسمها،
ورجعت لاكتئابها تاني، ورجعت تاكل تاني؛
بسبب إنها مش شايفة روحها حلوة بسبب الـلـي كانت بـ تسمعه.

حتى أنا زيها برغم إني ما وصلتش للوزن ده،
بس بـ طلع طاقتي في الأكل وقت ما أحزن أو بمعني أصح أنا بحب الأكل….
لما بـ عمل دايت أو أنزل الجيم في وقت قصير بـ فقد شغفي،
وارجع تاني للأوضة انعزل، واكتئب.

أنا شكلًا جميلة بالنسبة لناس كتير،
بـ سمع دايمًا إطراءات على شكلي، وإني بنت حلوة ومرغوبة،
بس على الصعيد الآخر ما بـ لاقيش ده من الأهل،
الـلـي دايمًا فيه مقارنات وتحليلات معفنة بين الناس وبعضها،
وده شيء كفيل يهد ثقة أي حد في روحه، ويخليه مقبل على الانعزال أو الانتحار.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر