وانا صغيرة كنت عايزة أبقي ولد طبعا …
كنت بـ شوف أخويا وولاد أعمامي مسموح لهم يلعبوا في الجنينة اللي ورا البيت لحد وقت متأخر وانا لأ. وكانوا ينطوا من فوق السور ويزوغوا يخرجوا ويرجعوا يكذبوا ويألفوا حكايات …
وانا لو حاولت أتصل ببنت عمي في التليفون بالليل يقولوا لي"ليه؟ ما انتوا بـ تشوفوا بعض الصبح"
"لأ بلاش كلام كتير عشان ما تطلعيش رغاية!"
لو رحت أزورها وقعدت لحد المسلسل العربي ما يخلص - لحد ٩ مثلا - أبقى اتأخرت
كنت بـ قعد طول الليل أعيط أنا ليه مش ولد
ليه ممنوع عليا وابقي مش كويسة عشان قعدت لـ ٩ اتفرج على المسلسل،
وهم يتأخروا لحد ٣ بالليل عادي؟
بابا كان صعب أوي …
ما كانش محتاج يضرب، كان كفاية يوقفنا كده ويقول لنا كل أنواع التهديد
كنت بـ تخيل العلقة فبـ سكت
"هـ موتك من الضرب!"
فانا كنت عارفة ده معناه إيه لأني كنت بـ شوف أخويا بـ يتضرب
وبعدين أبويا كان يقول لي:
"انتِ بنت! غير لما أخوكي يتضرب،
انتِ لو اتضربتي هـ تموتي
جسمك هـ يزرق وهـ تموتي!"
