عم محمود

عم محمود

فى يوم، أختي رنت عليا: "سعاد أنتِ فين؟"
قولت لها: "أنا مع ماما"
"طيب خلاص، أنا جاية بالعربية عشان آخدك
وعم محمود جي معايا"
"مين عم محمود ده؟"
عم محمود ده سواق أختي تعرفه
بـ ينـقـل لها الحاجات، وبعدها اتعرف على ماما.

لاقيت أختي جت هي وسايقة جنبها عم محمود
راح عم محمود راجع ورا، وأمى قعدت جنب أختي،
وانا قعدت جنب عم محمود ورا.

فاحنا وماشيين، قاعد يقول لي:
"إزيك بقى يا أبلة سعاد؟"
"الحمد لله"
"ها، أنتِ بقى معاكي إيه؟"
"أنا مخلصة بكالوريوس خدمة، وعملت ماستر دلوقتي في مجال تنمية المجتمع
وشغالة يعني، والمفروض هـ ناقش السنة دي"
فهو راح قال لي: "لا لا لا مش مشكلة، بـ تعرفي تطبخي؟"
قولت له: "نعم؟ بـ قولك ماستر، تقول لي بـ تعرفي تطبخي؟"


فبصراحة أنا اتضايقت
إزاي أنا عندي طموح، وبـ كلمك عنه، وانت ترد عليا بالرد ده
فأنا إيه، من عادتي، أي أزمة بقلبها حاجة كوميدية يعني
فـ قولت له: "آه يا باشا، بـ عرف أطبخ وأي حاجة
بس ماليش فى الحلويات"
قال لي: "ماشى"،
وراح طلع من جيبه تليفون، وقال لي:
"هو أنتِ عندك كام سنة؟"
"هو إحنا دخلنا في كام سنة؟ فيه إيه؟ عندى 28 سنة، اشمعنى يعني؟"

أنا كل الـلـي جه في دماغي، إن ده فعلًا عريس جايـبـهـولي
وقولت إيه، اطلعي من الموقف
بس مفيش، لاقيته راح تك تك، اتصل بحد
"ها يا محمد، إيه الأخبار؟ هو حمادة عنده كام سنة؟
عنده 25، وهي يعني 27 سنة
مش مشكلة سنتين تلاتة، مش مشكلة
أهم حاجة إيه العروسة، خد أهي العروسة معاك".

أقسم بالله هذا ما حصل
لاقيت التليفون فجأة على ودني
ده فعلًا ولا إيه؟
فـ برد: "أيوا، مين؟"
بـ يقول لي: "ده إحنا سألنا عليكي، وأهم حاجة الأخلاق، وما شاء الله
وسيبك من السن، تلات أربع سنين مش مشكلة
وانا أخويا آه سنه صغير، بس تشوفيه، فلح وحيطة كده جوداميكي"
"يا عم أنت مين؟"
قالى: "مش أنتِ أبلة سعاد؟"
"آه، أنت مين؟"
"أنا أخو حمادة العريس".

كان نفسي أقول له طب إيه؟ هي دي الكاميرا الخفية؟
هـ نذيع ولا مش هـ نذيع وكده؟
فعلًا اتعصبت، فـ قولت له: "أنا 28 سنة، وأخوك ده 25 فانا مش هــ ينفعني"
"يا أستاذة بجول لك مش مشكلة، أهم حاجة الأخلاق والعيلة
إحنا سألنا، وحمادة نازل أجازة كمان أسبوعين
فـ نـجـيـلك امتى؟"

أنا قمت رميت التليفون، وقولت لأختي وقفي حالًا، ونزلت من العربية
والـلـي هو أنا وقفت ثواني، وكل الـلـي فكرت فيه إن دي يمكن الكاميرا الخفية
والـلـي هو في دقيقة، طلع التليفون، وطلب، والعروسة آهه معاك
عروسة مين يا عم أنت؟
لا وكله كوم، ولما بـ قول له عاملة ماستر يقول لي:
"لا لا مش مشكلة، المهم أنتِ بـ تعرفي تطبخي؟"

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر