كنت في تانية كلية وكانت في حياتي مشاكل كتير،
سواء فـالدراسة أو البيت أو علاقات،
وكنت بلجأ دايما لمرشد روحي عارف أسرتي، وكنت بـ حكيله دايما كل حاجة.
في البداية كان بـ ياخدني في حضنه، ويطبطب عليا وانا بـ عيط،
ودي كانت حاجة بحبها لأني كنت بـ عتبره زي بابا، أو زى حد كبير مدرك مدي احتياجي للأمان.
لكن بعد كده الموضوع اتطور وبدأ يتحرش بيا.
أنا فاكرة كويس إني من كتر الصدمة كنت ساكتة، بس جوايا كان بـ يصرخ
لأ ما ينفعش انت تعمل كده، انت بالذات.
من زمان وانا بـ تعرض لتحرش جنسي والموضوع كان بـ يألمني جدا، وكنت بـ حكيله هو دايما.
وقت ما هو كمان عمل كده كنت عايزة أفكره
ازاى انت كمان تعمل كده؟!
كان تحرش جسدي واضح وكان بـ يتكلم عن قد إيه هو كان عايز يعمل كده من بدري.
أنا بعدها عشت في حالة من الإنكار إن ده حصل أصلا،
وعديت أسبوع وروحت تاني عشان أثبت لنفسي إنه ما حصلش حاجة، وألاقيه بـ يتعامل الطبيعي.
لكن لما روحت تاني حاول يعمل كده،
وقتها أنا ثورت، وغضبت، وضربته، وجريت.
الموضوع ده عدي عليه أكتر من 7 سنين،
ورغم إني حكيته كتير، وبعدها اتعالجت نفسيا، وحضرت كورسات عن شفاء والتعافي من التحرش،
إلا إنه لسه بـ يأثر فيا وبـ يحزني، ولسه بسببه باقي مشاعر وحشة جوايا