أنا هـ قول لك على اللي شـفته في حياتي كلها
كنت عايشة زي أي واحدة ما هي عايشة
كنت عايشة مع والدتي وأختي وأخويا، ووالدي كان متوفي
والدتي كانت مدلّعانا أوي، كنت كل حاجة أنا عايزاها تيجي
من كتر دلعها فيا ما نفعتش في مدارس فنزلت السوق معاها
وعرفت الدنيا كلها
جوزتني محسن وأنا عندي 15 سنة
أنا كان مفرحني إني هـ لبس فستان فرح
بس فجأة لاقيت نفسي متجوزة ما أعرفش ازاي
بعد عشر شهور من الجواز جبت ابني
بعدها بقيت أحس إني مش موجودة خالص
ولاقيت نفسي عبارة عن واحدة واقفة في السوق ومعاها خمس عيال
لاقيت الدنيا كلها طمعانة فيا
السوق عندنا وأهله، وولاد عمه، وأخواته، ومعارفه
ما أعرفش إيه فيا يخلي الناس تـبـص لي
من قلة القرش مع محسن
عرفت محمد واشتغلنا في البودرة سنة
ومحدش كان يعرف عننا حاجة
ولاقيت عيالي هـ يضيعوا مني
والناس بـ تتكلم عليا كلام مش كويس
سبت البيت ومشيت وأخدت البت معايا
واتطلقت من محسن واتجوزت محمد
الناس كلها بعدت عني
وما بـقـتـش أعرف أشوف ولا أمي ولا عيالي
بعد ما اتجوزت محمد اتمسكت أنا وهو في شغل
وقعدت في القسم تلات أيام
والظابط لما عرف أهلي مين مشاني
وقال لي "ما أشـوفـكـيش هنا تاني"
بعدها روحت له زيارة فمسكوني
دخلت السجن وشفت أيام سودا كتير فيه
ما كانش معايا أجيب السيجارة
وربنا كرمني بناس كويسة وقفت جنبي
وفضلت أبعت لأخواتي
وكانت أول زيارة بعد أربع شهور
أخويا جه يعاتبني
هو انتوا كنتوا فين لما سبتوني وسط الناس دي كلها
كنت فين لما جيت قلت لك إني محتاجاكم
وإن محسن مش محافظ عليا في حاجة، بقيت تقفل بابك في وشي
جوا السجن اشتغلت عند واحدة اسمها ابتسام المنوفي
يوم كنت بـ لاقي أكل ويوم مالاقيش
يوم أعيش كويس ويوم لأ
لغاية ميعاد الزيارة
بس محسن هو اللي من الأول سابني أضيع وسط الناس
بقي ينزلني السوق وضيعني
كنت أقول له: "مش عايزة أنزل السوق أنا عايزة أقعد وسط عيالي"
كان يقول لي: "انت فاكرة نفسك واحدة ست انت مش ست أصلا،
أنا حاسس إني متجوز واحد زيي زيه"
طيب أنا فين؟ اللي جوايا فين؟
أنا بني آدمة عايزة أحس إني واحدة ست
كنت أقول لأمي: "يا أمي عايزة أتطلق"
تقول لي: "لأ انت معاكي خمس عيال"
لما ظهر لي محمد ده حسسني بكل حاجة، لاقيت نفسي معاه
كان بـ يتمنى لي الرضا أرضي، كنت أنا أول جوازة ليه
جوزي الأولاني كان بـ يجيب لي برشام وحشيش، ويقول لي: "خدي اشربي"
محمد كان بـ يقول لي: "لأ مش عايزك تاخدي أي نوع من أنواع المخدرات"
خفت أعمل الغلط معاه وأنا ما ينفعش أعمل الغلط
فاطلقت واتجوزته، آه اتجوزته عرفي
وحاسة إني غلطت لما اتجوزته عرفي
بـ حس دلوقتي إن عيالي بصتهم ليا مش كويسة
بـ يعايروني بالموقف ده
بيقولوا لي: "انت سـبـتـيـنا ومشـيـتي،
وروحتي اتجوزتي واحد بتاع مخدرات،
انت خلتينا في الشارع ما نسواش حاجة"
بس أنا بالنسبة لي ما غـلـطـتـش
عشان مفيش واحد ييجي في الشارع يقول لابني ده أمكم كانت مع فلان
ما حـبـتـش أمشي في طريق زي ده
دلوقتي أنا ما بـ عرفش أخرج مع عيالي،
ابني ما بـ يرضاش يخرج معايا أبدا بـ يقول لي:
"بـ حس الناس كلها هـ تبص لك دايما، انت ليه ما بـ تـكـبـريش زي الناس؟؟ أنا بـ حس إنك بـ تصغري!"
وأبوهم اللي فتح لي الطريق ده سهل جدا
سابهولي مع ناس كتير وأقربهم أصحابه
كنت بـ حس إنهم بـ يجوا البيت ليا أنا مش لجوزي
كانت بصاتهم ليا غريبة
كنت بـ حس إنهم عايزيني ليهم وأنا ما كـنـتـش عايزة غير عيالي
بس محسن ده خلاني أسيب الدنيا كلها
وأروح أدور على راحتي أنا، وأدور على فلوس
أنا واحدة قالت لي: "عيالك اللي بـ يحاسبوا لغاية دلوقتي علي غلطة غلطتيها مع واحد"