قصتي مختلفة عن الـلـي بـ يتنشر، الحمد لله كان عندي أهل واعيين؛
ماما كانت بـ تخليني أناولها الفوط الصحية وانا صغيرة عشان تستخدمها؛
عشان تخليني اسألها إيه ده، وردت عليا بكل بساطة إن:
"دي حاجة كل البنات هـ تحتاج تستخدمها في يوم من الأيام، وهـ تكون علامة على إنها بـ تكبر وتحلو".
طبعًا عقلي وانا صغيرة ما كانش هـ يستوعب يعني إيه تبويض، وبطانة رحم، وبلوغ،
بس واحدة واحدة كانت بـ تفهمني.
ويوم ما جت لأختي الكبيرة - وطبعًا كانت مخضوضة برضه؛
لأن مهما كانت فاهمة، فهي بـ تتعرض لحاجة جديدة -،
ماما خدت الموضوع بضِحك، وفضلت تهزر معاها.
بابا بـ يروح يشتري لنا الفوط الصحية،
ولما ماما بـ تكون بايتة عند قرايبها مثلًا، بابا بـ يجيبها، ويـيجي يقولنا:
"لو واحدة فيكوا محتاجاها، أنا عاينها في المكان الفلاني".
ولما أنا جت لي، وكليتي كانت بعيدة، وبقيت أسافر، بابا كان لما يـيجي لي السكن،
ألاقيه جايب لي هدوم، وأكل، وفوط صحية.
ما بـ يتعاملش معاها على إنها مرض، ولا قرف،
ولا بـ يـنـبـذنا زي ما بـ سمع إنه بـ يحصل في باقي البيوت.
الحمدلله على نعمة الأهل الـلـي بـ تفهم.