أول مرة حاولت تبوسني هربت منك،
وانت قلت لي: "يا جبانة"!
كنت خايفة، خايفة من نفسي ...
جوايا واحدة بتقول لي: "متأكدة إنك عايزة تقربي له أوي كده؟"
كل اللي قربوا لي وجعوني...
وبعدين مش يمكن ما أعرفش!
لا هو أكيد مش هـ عرف... يعني هـ عرف منين؟ ده أنا نيلة!
وانت … انت كنت … خاربها، لافف ومجرب!
خفت ما تتبسطش...
فلما حاولت تبوسني، كل ده كان في مخي…
فحسيت إن الأحسن إني أفضل آجل إنها تحصل!
أول مرة بوستني كانت أول مرة أتباس!
المرة اللي حصلت قبلها، ما حسبتهاش...
محاولة همجية، ما كملتش ثواني سابتني منملة وقرفانة...
لكن انت… كنت…
ما كنتش أي حاجة أنا خايفة منها...
حتى طفولتي وسذاجتي:
"افتحي بقك"
"ليه؟"
"كده"
"لا يععع"
كنت بـ تبتسم وتضحك... فـترد لي جزء من ثقتي بنفسي،
كانت كسرتها الأيام…
كنت فاكرة إن في العلاقة هـ كتشفك لكن لاقيت إني بـ كتشفني…
بـ كتشف نفسي، وجسمي، وكأن أول مرة أشوفني…
وأبص لك، واقول لك بنفس الطفولة "احضني"... فـتحضنني،
وفجأة أحس إني في أءمن، وأهدى، وأجمل مكان في الدنيا
الوقت بـ يقف، زي ما بـ يقولوا في الأفلام.
هو مش بـ يقف، لكن فجأة ما بـ يبقالوش أي أهمية...
مجرد رقم تعيس بـ ييجي بسرعة ويكون سبب إني أخرج برا المكان الهادي الجميل ...
برا حضنك