مشكلتي جسمي

مشكلتي جسمي

فجأة لاقيته كبر وبقيت مضطرة إني أخبيه دايما
أخبي شعري، أخبي صدري
والحيض بقى سر قومي بـخبيه

جسمى اتسبب لي في حاجات كتير أكتر من الوحدة والعزلة
اتسبب إن يحصل لي تحرش من خالي في مرة، ومن جاري في مرة
ومن واحد صاحب مكتبة كنت بـصور ورق عنده في مرة
وأنا ما كنتش عارفة إن ده تحرش
ما كنتش عارفة إن صاحب المكتبة زنقني علشان يتحرش بيا
ولا كنت عارفة إن خالي لما شدني جنبه على السرير وقعد يعمل حاجات غريبة
ولما جريت وسيبته جرى ورايا علشان كان خايف إني أقول حاجة
مش علشان كان بـ يلعب معايا
ولا كنت أعرف إن جاري اللى كان بـ يجيب قواقع من الميه ويديها لي
كان علشان بس يلمس عضوي التناسلي تحت الميه

لما كبرت عرفت إن ده كله اسمه تحرش
وإن ضيقي في المواقف دي
ما كانش مجرد ضيق مش مفهوم
ما كنتش أعرف إن ده تحرش وإن لازم يتبلغ عنهم
وفي الآخر كرهتهم، وكرهت البلد، وكرهت جسمي

جسمي خلاني أول واحدة يتعمل لي ختان في زمايلي
أول واحدة أروح لدكتور يفتح رجلي
ويتفرج ويقول آه لازم تعمل العملية
دكتور جراح كبير قرر إني لازم أتحرم من لذة الجنس
اللي الناس كلها بـ تحكي عنها
قرر ده وخلاني أمر بأكتر تجربة مؤلمة في حياتي
كنت بـبكى من غير صوت
لأني كنت عارفة إن الصراخ مش هـ يكون مفيد ولا هـ يغــيـــر حاجة
كنت بـبكى لأني حسيت بالإهانة
وجوايا بـكره جسمي أكتر وأكتر

بس ما كرهتهوش لوحده
كرهت أبويا وأمي كمان معاه
ومن وقتها ما بـ قولش يا بابا ويا ماما، وبـ دور على بابا وماما تانيين

جسمي خلى حد يمسك صدري في الشارع
وانا طفلة لسه في 5 إبتدائي، ويضحك
ما كنتش عارفة المفروض أعمل إيه
غير إني أكره جسمي أكتر وأكره إني بنت
وأتعامل كأني راجل في مشيي وفي كلامي، وفي تصرفاتي
كنت بـ قول لنفسي لو بقيتي ولد أحسن وده سهل
اتعلمي تبقي ولد
وبعد كده اعملي عملية وحولي
كنت بـ قول للناس كلها إني هـ حول وهـ بقى ولد

حتى لما بـفكر في الحب ...
مريت بتجارب ناس بـ تحاول تستغلني جنسيا
ناس عايزة تفضي شهوتها فيا
وجربت مع ناس منهم السكس على الفون لمجرد إنهم عايزين كده
بس كانت حاجة مقززة جدا وما حبتهاش
كنت بـ مثل اللي المفروض يحصل على حسب ما كان الطرف التاني بـ يوجهني
بس ما كنتش بـ حس بحاجة غير القرف
بعدت عن الناس دي وأي علاقة بـ لاقيها دخلت في السكة دي
بس في مرة واحد كان عايز مني الجنس بس برضه
بس لما اتكلم معايا وقلت له إني بـ قرف من الجنس
وقلت له على الختان
قال لي انت باردة جنسيا
أنا باردة جنسيا وبـ كره أهلي إنهم عملوا فيا كده
ومش قادرة أسامحهم
بطلت أثق في الحب


أنا عارفة إن شكلي وحش لأن أخويا قال لي كده كتير
بس أمي كانت بتقول له: "ربنا هـ يعوضها بجواز حل"٬ كأن شكلي ده ابتلاء
بطلت أثق إني ممكن ألاقى حد يحبني
رغم إني بـحب كتير
بس بـ خاف أرتبط
مش بـ صدق إن فيه حد ممكن يحبني ويبقى عايزني فعلا

أنا بـ كره جسمي لأنه بـ يمنعني من الحب، ومن الحياة، ومن أحلامي

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر