"فرحانة بنفسك؟ شكلك لا بنت ولا ولد، شكلك مسخ".
هاي العبارة الـلـي بـ تذكرها أكثر إشي، وبـ تذكرني بأيام البلوغ، ووقت ما اجتني الدورة.
كنت خايفة؛ لأنه الكل كان بـ حكيلي إنه بس أبلغ وتيجيني الدورة،
في أشياء كتير رح تتغير، رح أبطل أقدر ألبس شورتات، أو أركب البسكليت،
أو ألعب مع الأولاد في الحارة.
فـ قررت اسمي حالي سامي، وكنت أضرب أي طفل ما يناديني سامي،
وكنت أخفي معالم صدري، وألبس ملابس أولاد.
أهلي حاولوا بكل الطرق يقنعوني إني أكون بنت،
بس أنا كنت عنيفة جدًا، وهربت من البيت مرتين، فـ فقدوا الأمل.
أكثر عبارة متذكرتها من أمي لما كنا في السوق،
وكنت حساها مش على بعضها، وبس رجعنا على البيت صرخت في وجهي:
"اطلعي عحالك، مبسوطة؟ أنتِ شكلك لا شب ولا بنت، أنتِ مسخ".