حقي بدراعي

القصص كتير، من أول التحرش في الأتوبيس وانا 9 سنين
فاكرة كل حاجة بكل تفاصيلها الأولى.

أمي كانت بـ تخاف علينا ودايمًا بـ تاخدنا المدرسة في تاكسي
في يوم تعبت، وقررت إن أخويا الكبير يوصلنا،
طلعنا الأتوبيس لاقيت واحد جارنا من الشارع التاني،
نده عليا أنا وأختي، وقعدني على رجله علشان الزحمة.

أنا وقتها ما كـنـتـش فاهمة إيه الـلـي هـ يحصل
وبعدين حط إيده موضع العفة عندنا
مش قادرة أشرح أكتر...
وقتها ما كـنـتـش مدركة غير إني اتكسفت
وما حكيتش لحد، بس كنت خايفة.
خوفت أحكي
ولاقيت بنت في المدرسة، قالت لي:
"الراجل الـلـي كنتِ قاعدة على رجله قريبك؟"
قولت لها: "لأ"
قالت لي: "يبقى ما تسلميش عليه، لأنه مش كويس"
أكيد عملها حاجة.

الموقف التاني ده كنت 25 سنة، وماشية الصبح رايحة الامتحان
واحد حيوان وانا ماشية ضربني على مؤخرتي،
جريت ورا الموتوسيكل وما حـصلـتـوش، وقعدت أعيط.

أنا عندي 30 سنة، ومش عايزة أتجوز ولا ارتبط،
وبكره كل الرجالة
بس للعلم كل يوم في حالة تحرش، حتى لو لفظي
بس بقيت أقدر آخد حقي بدراعي.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر