أنا زي أي بنت بـ يجي لها عرسان
فيهم اللي بـ يترفض، وفيهم اللي بـ نفكر فيه شوية
مرة جالي عريس أخلاقه كويسة أوي
ومفيش فيه حاجة وحشة بس أنا رفضته ما كنتش حاساه

بعد ما رفضته، لاقيت خالي اتصل بيا وقال لي:
"العريس اتصل واخد ميعاد وهـ يجي لنا بكره"
أنا اتضايقت إنهم بـ ياخدوا مواعيد وبـ يقرروا من غير رأيي،
وقلت له: "لأ، مش موافقة!"
قال لي: "اقعدي معاه وبعدين قرري، أنا مش هـ جبرك على حاجة انتِ مش عايزاها"
جه العريس وقعدت معاه
هو كان كويس بس أنا ما كنتش متقبلاه
بعد ما مشي خالو اتفق معاه إنه هـ نرد عليه بعد أسبوع
في الوقت ده قعدوا أمي وخالاتي يضغطوا عليا عشان ما كنتش موافقة
وفيه واحدة جارتنا قالت لماما: "بنتك خايبة، ما تخليهاش ترفض
عشان ما يطلعش عليها سمعة إنها بـ ترفض عرسان"

اتأخرت في الرد ولما رديت وقلت: "موافقة" كان عشان خاطر ماما
بعد ما اتصلوا بخالو قالوا له إني وافقت
رجعت قلت لهم: "كلموه تاني وقولوا له هـ فكر تاني"
فضلت على الحال ده يوم كامل
كل نص ساعة برأي موافقة، وبعدين مش موافقة
ماما خاصمتني، كانت مصرة عليه جدا
فقلت لازم أفصل من جو البيت شوية
فرحت أقعد مع خالتي يومين
لاقيت ماما جت ورايا وقعدت معايا هناك
وبقت بـ تتخانق معايا هي وخالتي
لدرجة إن صوتنا كان بـ يبقي عالي في عز الفجر من الخناق
وخالتو قصادها تقول لي: "وافقي"
ومن وراها تقول لي: "اعملي اللي إحساسك يقول لك عليه"

في الوقت ده وهم بـ يتخانقوا معايا، كانوا بـ يكلموا خالو ويشتكوا مني
بس هو كان بـ يكلمني ويقول لي:
"أنا مش هـ جبرك على حاجة انتِ مش عايزاها وسيبك منهم"
كلام خالو شجعني ووصلت لقرار نهائي إني مش هـ وافق وقلت لأ
بعدها ماما قعدت ترميني بالكلام طول الوقت بعد ما رفضت
"انتِ خايبة"
"الراجل كان كويس"
خصوصا بعد ما عرفت إنه خطب
بـ تذلني بالموضوع ده يمكن لحد امبارح.