أنا عارفة إن الـلـي هـ قوله ده هـ يبقي عادي جداً فـ نظر ناس كتير،
بس في نظرية بـ تقول إن كل إنسان مشاكله بـ تبقي مهمة جداً بالنسبة له هو بس،
حتى لو مش عظيمة.

العنف الأسري دمَّر لي حياتي كلها،
وانا لسة مكمِّلـة الـ 18 من قريب ونفسي أموت.
وانا صغيرة ماما كانت بـ تضربني - والمعروف إن دي أهم خطوة فـي تربية الطفل -
مع إن هي كانت بـ تقولي إن غلطاتي كانت قليلة بـالمقارنة بأخويا الكبير.
وزي ما هي برضه بـ تقول، إني كنت ذكية وعقلي كبير،
طب ليه كانت بـ تتعامل معايا بغباء؟
ليه كانت بـ تضربني لما كنت بعمل حمام على نفسي،
وانا كبيرة كفاية إني أفهم إن في تواليت، بدل ما تشوف المشكلة فين وتعالجني؟
أو ليه تضربني لما أطلب أحط روچ زي أي طفلة قدام حد؟
مع إنها ممكن تـقولي لا وخلاص.
ليه ضرب بـالحزام والسلك والجزمة لما ممكن تـفهِّميني بـالعقل؟
أنا كنت طفلة، لسه بـ جرَّب حاجات لأول مرة ولسه بـ تعلم الصح والغلط.

ليه لما قلت لمدرس الـحساب فـالمدرسة إني مش بـ ذاكر عشان مفيش حد فاضي يذاكر لي، ضربـتـيـني؟ مع إني ما رضيتش أقوله إن محدش هـ يعرف يذاكر لي عشان مش مكملين تعليمهم!
ليه كنت بـ تجبريني أعمل حاجات غصب عني،
الـلـي هو بجد مش فارق عندك أنا هـ حس بـإيه أو هـ تضايق إزاي؟

بابا ضربني مرتين عمري ما هـ نساهم له،
مع إني بحبه جداً وبحب إنه فهم يـتعامل معايا إزاي بعد كده.

ليه خبطِّتي دماغي فـالحيطة وانا عندي 12 سنة عشان ما سمعتش الكلام؟
ماما هي السبب فـي إني حاولت أنتحر وانا طفلة عندي 12 سنة.
وهي السبب فـي إن يجيلي اكتئاب وانا لسه فـي 3 إعدادي، وبعيش أحلي أيام حياتي *المفروض*.

أحب أقول لها ما تـسـتغـربـيـش إني بـ كرهك أو بكره البيت ده.
ما تـسـتغـربـيـش لو قتلت نفسي أو طفشت،
ما تـسـتغـربـيـش إني عصبية جداً من غير سبب،
عـشـان أي حاجة أنا فيها دلوقتي أنتِ السبب فيها.

أي أم لازم تفهم إن الضرب ده أسوأ طريقة تربية فـالكون ضد أي حد بالذات لو طفل،
عشان الأذى النفسي ممكن يعلِّم مدى الحياة،
ممكن تدمري حياة ابنك أو بنتك مدى الحياة، وانتِ فاكرة إنك كده بـ تربيه.