أول علقة كانت من محمد أخويا
كان عندى 14 سنة كده
كنت طالعة متدلعة على كذا ولد
يومها كنت لابسة جيبة، وواقفة عـالباب، إزاي بقى أقف كده؟
أخويا ضربني بـالخرطوم على صدري، واتـحـسـبـنـت عليه، تاني يوم اتحبس.

تاني علقة بقى أمي قالت لي: "خدى مفتاح شقة أخوكي، وروقي له الأوضة"
روحت روقت، وغسلت، وغيبت حوالي تلات أربع ساعات
وهو قال لي: "قدامك ساعة، ساعة ونص بالكتير"
لما رجعت مـا اتكلمش، راح جايبني من شعري كده
وإدي إدي إدي، ووشي يروح شمال، ويروح يمين
وأمي تقول له: "اضربها بنت الكلب الشرموطة دي".

أنا أخدت علق كتير من أمي ومن أبويا ومن جوزي،
جوزى مرة ضـربـنـي عشان خاطر أمه،
من كتر الضرب كنت عايزة أنط مالبكونة
شدني، ربطني في الباب، وكمل عليا
قعدت أقول له: "دراعي اتكسر، دراعي اتكسر"
فين وفين على ما فكني، وخلى أخوه راح جبسني في القصر العيني.

نفسي أفش غلي في جوزي
بـخاف منه أوي
نفسي لما يعمل لي حاجة أعرف أتكلم
لكن أنا بـ خاف أتكلم، وبـ خاف أتضرب
بـخاف مـن الضرب أوي، وبـ زعل لما يـهـيـنـي قدام بناتي
مرة ضربني قدام أمي ورم لي عيني
وأمي بدل ما تراضيني، راحت تراضيه هو
بـ تضايق عشان مـا بـيـتـكـلـمش معايا
بـ يقعد مع صحابه كتير، لكن معايا أنا على طول لابس لي الوش الخشب
نفسي أقول له حاجات كتير.

أنت مش حاسس بيا، ولا حاسس بـ الـلـي أنا فيه
عمرك ما شيلت هم عيل ولا عيلة، ولا حتى بـ تـسألني "مالك؟ فيكي إيه"
لما يكون عندك مشكلة بـ قعد اسمعك، ولما بـ آجي أشكيلك ما بـ تـسـمـعـنـيـش
بـ تقعد تـ تفرج عـالتلفزيون كأني كرسي قدامك
زي ما يكون الإحساس اتشال من قلبك
بـ حس إني ماليش لازمة قدامك.