أول يوم شغل كنت سعيدة جدا عشان كنت قاعدة فى البيت ما بـ خرجش
كنت طالعة أنا وواحدة صاحبتى مونسين بعضنا وما كـنـتـش خايفة
مع إنه كان أول مرة أروح حته بعيدة
حسيت إن أنا مهمة لما الست كانت بـ تكلمنى عشان توصفلى الطريق
صاحبتى كانت خايفة من اللى بـ تسمعه من الشغالات
وأنا قلتلها المفروض الست هى اللى تخاف مش احنا، احنا اتنين وهى بطولها
بس الست طلعت أميرة واعتبرتنا زى عيالها
خلصنا الشغل عالـضهر كده والست مـا ضـغـطـتـش علينا وبسطتنا فى الآخر
كان يوم جميل جدا جدا ومش هـنـسـاه

أنا بـحب الشغل بس نفسى تبقى شـغـلانـتـنـا زى أى شغل
كل الشغلانات اتطورت، الطباخ بقى شيف، والبواب بقى أمن
إلا الشغلانة بتاعتنا دى، الناس بـتـبـصـلـها بصة قليلة
واحنا كمان بـ نـتـكـسـف نقول إن إحنا بـ نـشـتـغـل فى البيوت
عشان أهل الواحد بـ يسألوا
"ليه جوزها مرمطها كده"، وحاجات بــ تـوجـع القلب من جوا
يعنى أهالينا بـ يضطروا يكذبوا عشان كلام الناس
وإحنا بـ نكذب وبـ نـتـكـسـف نقول

والناس كمان بـ تعاملنا معاملة الجرابيع، معاملة العبيد
زى مثلا إن أنا يكون ليا كوباية وهم ليهم كوباية
مع إن احنا يعنى كلنا ولاد حوا وآدم
ومرة واحدة قالتلى: "اغسلى إيدك بالكلور عشان هـ تـمـسـكى الكوباية"
عايزاني أغسل إيدى بالكلور الخام كمان؟ ليه؟!
"افرشيلى السرير"
"نزليلى الجزامة امسحيها جزمة جزمة"
"إيه الريشة دى؟ أنا هـ رمـيـهـالـك"
مع إنهم بـ يـبـقـوا متعلمين بس نظرتهم إنك شغالة يعنى أقل منهم

لما كان حد بـ يضايقنى من الناس اللى بـ شتغل عندهم ما كـنـتـش بـ حكى لحد
كنت بـ قعد أشكى لربنا
أقعد أعيط وأقوله: "مش هــم دول اللى انت بـ تتكلم عليهم يا رب"
دول مش حاسين بالبشرية اللى موجودة، هم فاكرين إن الناس اللى بـ تـشـتـغـل عندهم طمعانين فيهم
فاكرين إننا بـ نبصلهم فى كل حاجة، بـ يعاملونا معاملة إننا تحت

مع إن إحنا لينا مهمة فى الحياة النضافة، والنضافة مالإيمان
يعنى إحنا مـحـتـاجـيـنـكم وانتوا مـحـتـاجـيـنا
لازم يعرفوا إن الخدامة إنسانة، هى اللى بـ تـنـظـف لـهم البيت
وكمان عاوزة يتأمن عليا
يعني وانا بـ شتغل ممكن أقع من عـالسلم، ممكن أتصاب أى إصابة
احنا عايزين الحكومة تعملنا تأمين زينا زى أى عامل

هو الشغل بـ يـبـقـى كتير ومتعب، بس ربنا بـ يـهـون علينا الوقت والجهد ده عشان إحنا محتاجين
الشغل مهم بالنسبة لى من غيره ما أقدرش أدفع الاقساط والجمعيات

دلوقتى أنا بـقـيـت بـ روح للواحدة مرة أجرب، لاقيتها كويسة بتدينى حقى بـ كمل
لاقيتها أم أويــق كده خالص ما بــروحش تانى
أنا بقالى 3 سنين شغالة، اتعلمت كتير من بيوت أشكال وألوان
كل واحدة غير التانية فيه ناس بـ تـبـسـط الأمور وناس مش بـ تـبـسـطـها خالص

احنا بـ نـشـتـغـل وبـ نتعب عشان لقمة العيش والغلا اللى احنا فيه
الـ 100 جنيه دى ما بــ تـنـفـعـش خالص
المواصلات غليت والحاجة غليت وكله عامل عبيط ومش عايز يدفع زيادة
أو تديكى 20 جنيه وتقولك: "ما تـتـعـوديـش على كده"
هو أنا بـ شحت؟!
أنا بـ عملك اللى انت عايزاه وباخد حقى
هى الـ 20 جنيه دى حاجة؟ ده انت بـ تـجـيـبـى علبة العصير بـ 20 جنيه
فيه ناس بـ تزود وناس بـ تستعبط، فـ بستعبط أنا كمان
بقولهم: "أنا مصاريفى كتير ومواصلاتى كتير وهـ قعد مالشغل"
الأول كنت باخد الفلوس وما أبـصـش فيها، دلوقتى بــ بص فيها قبل ما أمشى
وأعرف اديـتـنـى حقى ولا ما أدتـنـيـش حقى
أنا يوميتى 150 جنيه، قابلة كده قابلة مش قابلة خلاص ما بــ روحش تانى