عمري ما حبيت الميك أب، وعمري ما استريحت لإحساسه على جلدي،
من وانا في اعدادي في المدرسة وانا عندي مشكلة كبيرة مع الحبوب في وشي،
وروحت لدكاترة كتير، بس دايمًا الحل بـ يكون مؤقت، وبـ يرجعوا تاني،
لدرجة إني ساعات ما بـ عرفش أنزل الشارع أو أقابل حد؛ عشان شكلهم وِحِش.
والناس كل ما بـ يشوفوني بـ يقولوا لي: "طب ليه ما تروحيش لدكتور؟"
أو "حطي ميك أب حتى داريهم"، "ما ينفعش بنت تنزل بالشكل ده في الشارع".
مرة كنت في المترو، واحدة ما أعرفهاش وقفتني، وقالت لي:
"إيه القرف الـلـي في وشك ده؟ أنتِ ما بـ تـغـسـلـيـهـوش ولا إيه؟"، مع إن والله مالهاش علاقة.
كذا مرة خضعت لكلامهم، وقلت هـ حط ميك أب وخلاص،
ووشي اتبهدل أكتر من الأول، وكنت حاسة إن أنا مش أنا.
آخر خطوة هي إني أبتدي آخد علاج بالهرمونات، ودي أكتر حاجة خايفة منها الحقيقة؛
عشان ليها آثار جانبية، بس أي حاجة أكيد هـ تكون أقل من الوجع الـلـي بـ حسه لما حد بـ يتريق عليا.